"Bakıda itkin düşən üç rəfiqədən biri sığınacağa yerləşdirilib".
Bu barədə Teleqraf-a “Azərbaycan Uşaqları” İctimai Birliyinin sədri Kəmalə Ağazadə məlumat verib.
Onun sözlərinə görə, yeniyetmə aqressivdir və boyun hissəsində zədələr var:
“Bunu bir oğlanın etdiyini deyir. Təbii ki, bununla bağlı araşdırma davam edir. Hazırda Bakıda qızları cəlb edən və bilərəkdən torlarına salan gənclər var.”
K. Ağazadə qızın sığınacağa hələ yeni gəldiyini bildirib:
“Amma bir neçə gündən sonra buraya adaptasiya olacaq və reabilitasiyaya uyğunlaşacaq. Həmin qız valideynin istəyi ilə polis tərəfindən sığınacağa yerləşdirilib. Qızın özü də etiraz etməyib. Niyə bu addımı atması ilə bağlı ondan heç nə soruşmamışıq. Bunu soruşmaq hələ tezdir. O, öncə mühitə uyğunlaşmalıdır, buradakı yaşıdları ilə ünsiyyət qurmalıdır. Ondan sonra psixoloq və sosial işçilər öz işlərini görəcəklər.”
Birliyin sədri itkin düşən yeniyetmələrdən birinin valideyninin daha öncə sığınacağa müraciət etdiyini qeyd edib:
“Qızlardan biri 2023-cü ildə polis tərəfindən anasının iştirakı ilə bizə gətirilmişdi. Ana deyirdi ki, qız təhsildən yayınır, onu təhsilə cəlb etmək olmur. Uşaq burada qalmağı qətiyyən qəbul etmirdi. Valideynlə danışıb razılaşdırdıq ki, ən azından axşam evə getsin, gün ərzində isə uşaqlarla reabilitasiyaya cəlb olunsun, proqramlara və tədbirlərə qatılsın. Razılıq verdilər.
Biz onu ərizə əsasında qəbul etdik və Sosial Xidmətlər Agentliyinin alt sisteminə yönləndirdik. Çünki o, çətin tərbiyə olunan və həssas qrupdan olan uşaq idi. Valideynlə əlaqə saxlayırdıq, o da bizə “Sabah gətirəcəyəm”, “Bu gün gətirəcəyəm” dedi, amma sonda bildirdi ki, qızı gəlmək istəmir. Bir sözlə, həmin qız sığınacağa gəlmədi.
Sözsüz ki, bu məqamda valideynin də məsuliyyət məsələsi nəzərə alınmalıdır. Valideyn söz verib ki, gətirəcək, amma gətirməyib. Dediyim kimi, bu qız bizdə qeydiyyatda olub, amma cəmi bir gün qalıb.”
Xatırladaq ki, martın 17-də Bakıda üç rəfiqə itkin düşüb. Qızlardan ikisi tapılıb, digərinin axtarışları davam edir.
