Azərbaycanda ulduz kateqoriyası düzgün göstərilməyən hotellərin və hotel olmayan yerləşmə vasitələrinin reklamları dayandırılacaq. Bu qərar istehlakçıları aldatmaq və yanlış məlumat vermək hallarının qarşısını almaq məqsədini güdür.
"Report" xəbər verir ki, Dövlət Reklam Agentliyi (ADRA) ilə Dövlət Turizm Agentliyinin (DTA) birgə açıqlamasında bildirilib ki, müvafiq sertifikata malik olmadan daha yüksək ulduz dərəcəsi ilə reklam edən hotellər və "hotel" adı altında fəaliyyət göstərən digər yerləşmə vasitələri müəyyən edilib.
DTA, Bakı, Abşeron və Sumqayıtdakı hotellərin ulduz dərəcələrinin təyin edilməsi və sertifikatlaşdırılması prosesinin tamamlandığını bildirib. Hotel sahibləri açıq məkanda reklam yerləşdirmək üçün sertifikatlarını ADRA-ya təqdim etməlidirlər.
