Daxili İşlər Nazirliyi kibertalama ilə bağlı vətəndaşlara müraciət edib. Bu haqda bu gün, 14 may tarixində Bakuplus.az Daxili İşlər Nazirliyinə istinadən xəbər verir.
Mətbuat xidmətinin rəisi polis polkovnik-leytenantı Elşad Hacıyev kibertalamaya məruz qalma risklərinin gündən-günə artdığını qeyd edib.
"Diqqətli olun, üsullar fərqlidir, sosial şəbəkələrdə şübhə doğurmayacaq formada cinayətkar fəaliyyət var. Kiberüsulla hazırlanan nömrələrdən daxil olan şübhəli zənglərə, mesajlara qarşı tədbirli olun, danışmadan, yazışmadan bloklayın. Sizinlə danışan, yazışan Azərbaycan dilində sərbəst danışan xarici vətəndaş, hətta azərbaycanlı da ola bilər. O da ola bilər ki, o şəxs sizin haqqınızda tam məlumatlıdır, çünki barənizdə həmin məlumatları sosial şəbəkə üzərində olan qeydlərdən, yaxud dostlarınızdan, qohumlarınızdan götürüb. Şəxsi imkanlarınızı, varınızı, pulunuzu sosial şəbəkələrdə nümayiş etdirib diqqət çəkməyin. Cinayətkar qruplar tərəfindən profil və səhifə paylaşımlarınız, rəyləriniz nəzərdən keçirilir. Dostlarınız vasitəsilə sizi kimsə axtarırsa, ehtiyatlı olun, həmin şəxslə ünsiyyət yaratmayın", – deyə müraciətdə bildirilib.
Vurğulanıb ki, təkcə 13 may tarixində ayrı-ayrı vətəndaşlara məxsus bank kartlarından ümumilikdə 40.168 AZN və 2321 ABŞ dolları pul talanıb.
"Faktların təhlili göstərir ki, vətəndaşlar İnstagram, Telegram, Facebook, TikTok platformaları üzərindən əlavə gəlir qazanmaq, sığorta ödənişləri, turist səyahətləri, mebel sifarişi, qızıl satışı, ev-alqı satqısı, kirayə, kredit adı altında verilən yalan vədlərə inanaraq həmin tələb olunan məbləğləri başqa-başqa bank hesablarına köçürüblər. Sonradan həmin hesablar, linklər, telefon nömrələri dərhal qapadılıb", – deyə əlavə edilib.
