Dələduzluq yolu ilə vətəndaşlardan külli miqdarda pul mənimsəyən şəxsə hökm oxunub. Bu haqda bu gün, 29 iyul tarixində Bakuplus.az Qafqazinfo-ya istinadən xəbər verir.
Bakı Ağır Cinayətlər Məhkəməsində keçirilən prosesdə 31yaşlı Vahid Rzayev Cinayət Məcəlləsinin “Külli miqdarda dələduzluq” maddəsi ilə təqsirli bilinib.
Vahid Rzayev “Whats App” tətbiqində “Yatırım” adlı qrup yaradıb. Həmin şəxs sosial şəbəkələrdə qrupun reklamını təşkil edib. Ona müraciət edən vətəndaşlara yatırım etmək adı ilə qoyduqları sərmayənin 2-3 qat mislini ödəyəcəyi barədə vədlər verib, 100-dən artıq vətəndaşı aldadaraq 140.000 manatdan çox pul mənimsəyib.
O, əldə etdiyi pulları internet qumar oyunlarında xərcləyib və böyük hissəsini uduzub.
Məhkəmədə zərərçəkmiş şəxslər V.Rzayevlə borcun ödənilməsinə dair müqavilə bağladıqlarına görə, ondan şikayətçi olmadıqlarını bildiriblər. Bakı Ağır Cinayətlər Məhkəməsinin hökmü ilə 31 yaşlı R.Vahidə 5 il azadlıqdan məhrumetmə cəzası təyin edilib.
Lakin onun cəzası 2 il sınaq müddəti təyin edilməklə şərti hesab edilib və məhkəmə zalından azadlığa buraxılıb. V.Rzayev barəsində başqa yerə getməmək haqqında iltizam qətimkan tədbiri seçilib.
