Bakı Hərbi Məhkəməsi Vaqif Xaçatryanla bağlı hökm oxunub.
Qərara əsasən, o, 15 il müddətinə azadlıqdan məhrum olunub. Təqsirkar əzasının ilk 5 ilini həbsxanada, qalan hissəsini isə ciddi rejimli cəzaçəkmə müəssisəsində çəkəcək.
14:41 - Vaqif Xaçatryan bəraət istəyib
Vaqif Xaçatryan son söz deyib. O, özünü təqsirli bilmədiyini bildirib, məhkəmədən bəraət istəyib.
Məhkəmə hökm elan etmək üçün müşavirəyə gedib.
11:20 - Prokuror Vaqif Xaçatryana 15 il həbs cəzası istədi
Prokuror Vaqif Xaçatryana 15 il həbs cəzası istəyib. Buna səbəb təqsirləndirilən şəxsin yaşının 65-dən çox olmasıdır.
Azərbaycan Respublikasının qanunlarına görə, 65 yaşı keçən şəxslərə ömürlük həddə azadlıqdan məhrumetmə cəzası verilməsi qadağandır.
Bundan əlavə, Azərbaycanın 2014-cü ilə qədər qüvvədə olmuş qanunvericiliyinə əsasən, sülh və müharibə əlehinə olan cinayətlərə görə sanksiya həddi 10 ildən 15 ilə qədər azadlıqdan məhrumetmə cəzası olub. Beynəlxalq konvensiyalara da əsasən, şəxs hadisəni törətdiyi vaxta uyğun olan qanunvericiliyə görə cəzalanmalıdır
Bu halda ən ağır cəza 15 il müddətində həbs olunmaqdır.
09:23 - Vaqif Xaçatryana bu gün cəza istəniləcək
Vaqif Xaçatryanın məhkəməsi bu gün davam edəcək. Bu haqda 7 noyabr tarixində Bakuplus.az Report-a istinadən xəbər verir.
Məhkəmə iclası Yasamal Rayon Məhkəməsinin inzibati binasında Bakı Hərbi Məhkəməsinin hakimi Zeynal Ağayevin sədrliyi ilə keçiriləcək.
Prosesdə dövlət ittihamçıları – Baş prokurorun böyük köməkçisi, 3-cü dərəcəli dövlət ədliyyə müşaviri Müqəddəs Sultanov və ədliyyə müşaviri Cövdət Mehrəliyev çıxış edəcəklər. Onlar təqsirləndirilən şəxsə cəza istəyəcəklər.
Ötən gün keçirilmiş iclasda Xaçatryan barəsində istintaqın yekunlaşdığı elan olunmuşdur.
