Havaların isinməsi, təbiətin oyanışı əhvalımızı yaxşılaşdırsa da, bəzi insanlarda narahatlıq yaradır. Martın əvvəlindən başlayan yorğunluq, halsızlıq, yuxusuzluq kimi əlamətlərdən şikayətlər səslənir. Bu hal “bahar yorğunluğu” adlandırılır və çox yayılmış vəziyyətdir.
Bəs, görəsən, yaz yorğunluğunun səbəbləri və ondan xilas yolları nələrdir?
Mövzu ilə bağlı Bakuplus.az-a açıqlama verən həkim-fitoterapevt Elnur Eldaroğlunun sözlərinə görə, yaz fəslində insan orqanizmində müəyyən dəyişikliklər baş verir:
“Qan dövranı sistemi, həmçinin hormonal balansla bağlı dəyişikliklər meydana gəlir. Bu, normaldır. Bu kimi hallar təkcə insanlara aid deyil, digər canlılar üçün də keçərlidir. Belə dövrdə insanlar yorğun ola, yaz depressiyasına girə bilirlər. Bəzilərində xroniki yorğunluq sindromu olur. Təzyiq xəstələrinin təzyiqi qalxıb-düşür. Qastritlərin aktivləşdiyi, revmatiklərin artdığı bir dövrə gəlib çıxmışıq.
Allergiya da təbiətin oyanışı ilə bağlıdır. Ən çox insanları narahat edən isə xroniki yorğunluq sindromudur. Heç nəyə həvəsin olmaması halları müşahidə edilir. Bu istər zehni, istərsə də fiziki və ya cinsi olaraq özünü göstərir. Xronikiləşməməsi lazımdır. Belə vaxtlar açıq havada gəzmək və idman etmək mütləqdir. Əgər çox ciddi yuxu problemləri yoxdursa, yuxu rejimini daha normal rejimə gətirmək lazımdır. Anormal yuxu rejimi hormonal problemlərə və ciddi xəstəliklərə gətirib çıxara bilər. İnsanlar normal hobbilər ilə məşğul olmalı, təbii qidalara üstünlük verməlidirlər”.
Psixoloq Gülər Məmmədova isə qeyd edib ki, ümumiyyətlə hava ilə əlaqədar olaraq bir çox insanlarda psixosomatik problemlər yaranır:
“Nəzərə alsaq ki, yaz ayında mütəmadi yağış yağır, külək və tutqunlu hava şəraiti olur, yaz fəslinin yaratdığı hava dəyişkənliyi bir çox insanların psixoloji durumuna müəyyən şəkildə təsirsiz ötüşmür, əhvalına təsir edir.
Bəzi şəxslər yağış yağarkən çox qəmgin olur, müəyyən stresə qapılır, əhvalında düşkünlük yaranır. Bu tip insanlarda havanın dəyişkənliyi ilə əlaqədar psixoloji cəhətdən dayanıqlılıq pozulur, onların müxtəlif situasiyalarda verdiyi reaksiyalar qeyri-adekvat ola bilir. Bir qisim insanlar üçünsə təbiətdə baş verən bu dəyişikliklər heç bir əhəmiyyət kəsb etmədiyindən onlar psixoloji cəhətdən özlərini rahat hiss edirlər. Həmin şəxslər fəsildən asılı olmadan, havanın hər hansı bir vəziyyətinə əhəmiyyət vermədən psixoloji durumu gözəl şəkildə idarə edə biləcəklər”.
Psixoloq qeyd edib ki, bu tip insanlar havanın istənilən vəziyyətində, hər cür şəraitdə zövq alırlar.
“Onlar həyatın fəlsəfəsini dərk edən insanlardır, baş vermiş təbii hadisələr onlar üçün psixoloji cəhətdən gərginlik yaratmır. Çox pozitiv olurlar, həyata bağlanırlar. Onların əksi olan insanlar isə özlərinə qapanır, stresə meylli olurlar, narahatlıqlarını ətrafa da sezdirirlər”, - deyə G.Məmmədova əlavə edib.
Nəzrin Vahid
