İnternetdə vətəndaşların elektron və bank kartlarındakı məlumatlarını oğurlayan, özünü Arseniks kimi təqdim edən kibercinayətkar tutulub. Bu haqda məlumatı Daxili İşlər Nazirliyinin mətbuat xidməti rəsmi Youtube kanalında paylaşıb.
Nazirliyin Baş Mütəşəkkil Cinayətkarlıqla Mübarizə İdarəsi əməkdaşlarının həyata keçirdikləri əməliyyat-texniki tədbirlər nəticəsində paytaxt sakini, yetkinlik yaşına çatmadığına görə şərti Əlizamin İslamov adlandırılan şəxs kibercinayətkarlıq üsullarından istifadə etməklə “İnstagram” sosial şəbəkəsində “baxıcı_falcı_arzu” adlı saxta səhifə yaradıb. O, falçılıq xidməti göstərdiyini iddia edərək, vətəndaşlardan pul qəbul edib.
İstintaq son 5 ay ərzində onunla əlaqə saxlayan 300-ə yaxın adamı müəyyən edib. Bu müddət ərzində Əlizamin İslamov vətəndaşların hesablarından 100.000 manata yaxın pul xüsusi proqramlar köməyi ilə çıxarıb. Bundan əlavə, İslamov “Telegram” səhifəsinə rəhbərlik edib və orada digər insanlara kibercinayətkarlığın üsullarını öyrədib.
Həbs edildikdən sonra onun mənzilinə baxış zamanı elektron məlumatlar, istifadə olunmuş mobil telefonlar, eləcə də digər kütləvi informasiya vasitələrindən internet vasitəsilə vətəndaşlara göndərilən mesajlar və digər sübutlar aşkar edilərək götürülüb. Saxlanılan törətdiyi cinayəti etiraf edib. Faktla bağlı istintaq davam etdirilir.
