Cari il martın 19-da piyadanın ölümü ilə nəticələnən yol-nəqliyyat hadisəsi törədən Vüqar Mikayılovun cinayət işi üzrə məhkəmə prosesi başa çatıb. Bu haqda bu gün, 18 iyul tarixində Bakuplus.az Qafqazinfo-ya istinadən məlumat verir.
Xəzər Rayon Məhkəməsinin hökmünə əsasən, Mikayılov 1 il 6 ay müddətinə nəqliyyat vasitəsini idarə etmək hüququndan məhrum edilməklə 3 il müddətinə azadlıqdan məhrum edilib. Bununla belə, onun cəzasını məntəqə tipli müəssisədə çəkəcəyi bildirilir və həmin yeri tərk etməmək barədə iltizam qətimkan tədbiri dəyişdirilmədən saxlanılır.
Araşdırma zamanı məlum olub ki, Mikayılovun “Kia Rio” markalı avtomobili ilə vurulan Teymur Daşdəmirov “Bakı Metropoliteni”nin Yol xidmətinin 1 saylı Yol distansiyasının rəisi olub. O, həmin gün 58 yaşını qeyd edib. Həmin şəxs doğum gününü restoranda qeyd edərək axşam saat 23:00 radələrində Milli Aviasiya Akademiyasının qarşısından yolu keçmək istəyərkən onu avtomobil vurub. Ağır bədən xəsarətləri alan Daşdəmirov hadisə yerində ölüb.
Müayinə zamanı avtomobilin 80 km/saat sürətlə hərəkət etdiyi, sürücünün spirtli içki və narkotik maddə qəbul etmədiyi müəyyən edilib.
Vüqar Mikayılovun oğlu Fərid Mikayılzadənin Vətən müharibəsi iştirakçısı olduğu və beş medalla təltif edildiyi də məlum olub.
Daşdəmirov heç vaxt ailə həyatı qurmadığından məhkəmədə zərərçəkmiş kimi onun qardaşı tanınıb. Məmurun yaxınları qarşı tərəfə heç bir iddialarının olmadığını bildiriblər.
