Ziya Bünyadov prospektində yol ayırıcı zolaqda olan ağaclar kökündən çıxarılıb. Ağaclar çıxarılaraq yeri asfaltlanıb. Bu haqda bu gün, 7 aprel tarixində ATV Xəbər-ə istinadən Bakuplus.az məlumat verir.
“Azəravtoyol”un mətbuat katibi Anar Nəcəfli bildirdi ki, sözügedən ərazidə xüsusi rəy əsasında yaşıllıqların köçürülməsi yalnız avtomobil tuneli və körpülər üzərində həyata keçirilib: “Ərazidə yol boyunca iki avtomobil körpüsü və bir avtomobil tuneli mövcuddur. Həmin yaşıllıqların suvarılması nəticəsində həmin avtomobil tunelində və avtomobil körpülərində erroziya baş verirdi. Bunun qarşısını almaq üçün həmin yaşıllıqların köçürülməsinə qərar verilib və xüsusi ekspertiza rəyi əsasında həmin yaşıllıqların köçürülməsi təmin olunub”.
Anar Nəcəfli əlavə etdi ki, çıxarılan ağaclar “Şamaxinka” adlanan yerdən Biləcəriyə gedən yolun sağında və solunda yerləşən yaşıllıq əraziyə əkilib və suvarılması təmin olunub. Proses tam olaraq başa çatıb. Həmin ərazidə mövcud olan digər yaşıllıqların köçürülməsi isə nəzərdə tutulmur.
