Ötən ay Azərbaycan Avtomobil Yolları Dövlət Agentliyi (AAYDA) Bakıdakı Ziya Bünyadov prospekti ilə Xəlil Rza Ulutürk küçəsinin kəsişməsində yeni yerüstü piyada keçidinin tikintisinə başlayıb. Bu haqda bu gün, 31 oktyabr tarixində Bakuplus.az 1News-ə istinadən məlumat verir.
AAYDA-nın mətbuat katibi Anar Nəcəfli bildirib ki, piyada keçidi üçün dayaqlar tikilib.
“Hazırda zavodda estakada hissəsinin yığılması prosesi aparılır. Yığıldıqdan sonra dayaqlara quraşdırılacaq. İşlərin gələn ilin birinci yarısında yekunlaşacağı gözlənilir”, – deyə Nəcəfli bildirib.
Layihəyə əsasən, keçidin uzunluğu 57 metr, daxili eni 3,5 metr olacaq. Yolun hərəkət hissəsinin üzərində 5,8 metr hündürlükdə yerləşən keçid qəfəs formasında örtülmüş metal konstruksiya olacaq.
İki giriş-çıxışı olan keçiddə beynəlxalq standartlara uyğun oval tipli panduslar quraşdırılacaq, əlilliyi olan şəxslərin rahat hərəkəti təmin ediləcək.
Layihə çərçivəsində yolun hər iki tərəfində yeni avtobus dayanacaqlarının, obyektin fəaliyyətinə nəzarət edən işçilər üçün otağın tikintisi, həmçinin piyada keçidinin ətrafının abadlaşdırılması nəzərdə tutulub.
