İçərişəhərdə Qoşa qala qapıları üzərində həkk olunmuş təsvirlər göstərir ki, hələ orta əsrlərdə Bakının öz gerbi olub. Burada öküz başı, iki kiçik disk, şir rəsmləri həkk edilib. 1683-cü ildə Bakıda olmuş alman alimi Engelbert Kempfer bu işarələri şəhərin gerbi adlandırıb. Kempfer belə hesab edirdi ki, şirlər - qala divarları, öküz başı isə dövləti gecə-gündüz (disklər) qoruyanlardır.
[https://1905.az/bakinin-gerbl%C9%99ri/]
Bakı şəhərinin ilk məlum gerbi isə çar Rusiyası tərəfindən 21 may 1843-cü ildə təsdiq olunmuşdur. Bu gerb dörd hissədən ibarət qalxan formasında lövhə idi. Birinci qızılı sahəsində pələng, ikinci qızılı sahəsində yerdən çıxan alov dilimləri təsvir olunmuşdur. Mifologiyada şir atəşpərəstlərin rəmzi sayılır. Üç alov isə Yanardağın ərazisində vaxtı ilə alovlanmış, lakin hal-hazırda sönmüş üç təpəyə əsasən qəbul edilib. Gerbin göy rəng fonunda olan üçüncü sahəsində yüklü dəvə təsvir olunmuşdur. Bu, şəhər sakinlərinin məşğuliyyətini simvolizə edirdi. Gerbin göy rəng fonunda olan dördüncü sahəsində yerə sancılmış lövbər təsvir olunmuşdur ki, bu da Bakının liman şəhəri olmasından xəbər verirdi.
Bakı şəhərinin ikinci gerbi 16 mart 1883-cü ildə təsdiq olunmuşdur. Bu gerbin əsasını 1878-ci ildə Bakı quberniyası üçün yaradılmış gerb təşkil edirdi. Gerbdə üç qızılı rəngli alov təsvir olunmuşdur. Üç alov qırmızı rəngli Aleksandr lenti (Aleksandr Nevskinin adına olan ordenin lenti) ilə sarınmış iki qızılı sünbüllə əhatə olunmuşdur. Gerbin yuxarı hissəsində, şəhər divarları şəklində stilizə edilmiş, çar tacı təsvir olunmuşdur. Bu gerb 1904-cü ildə inşa olunmuş Bakı Şəhər İcra Hakimiyyətinin binasının divarında həkk olunub və indi də mövcuddur.
[Фон Винклер П.П. Гербы городов, губерний, областей и посадов Российской империи, внесенные в полное собрание законов с 1649 по 1900 год. Москва-1991]
Sovet dövründə, 14 aprel 1967-ci ildə Bakı şəhərinin növbəti gerbi təsdiq edilmişdir və bu gerb 1878-ci ilin gerbinə oxşayırdı. 1975-ci ildə həmin gerbə bəzi dəyişikliklər əlavə olundu: üç atəş simvolu olduğu kimi saxlanmış, gerbin aşağı hissəsinə isə beş dəniz dalğası əlavə edilmişdi.
Bakının indiki gerbi 29 mart 2001-ci ildə təsdiq edilib. Hazırkı gerb göy rəngdə qalxan formasında olan lövhədən ibarətdir. Lövhə hər tərəfdən qızılı zolaqla əhatə olunub. Lövhənin aşağısında dalğalar və ortasında üç alov dili təsvir olunub.
