Müğənni Müslüm Maqomayev 17 avqust 1942-ci ildə Bakıda anadan olub.
Müslüm Bakı Konservatoriyasının musiqi məktəbində (indiki Bülbül adına Musiqi Məktəbi) fortepiano və bəstəkarlıq üzrə təhsil alıb. 1956-1959-cu illərdə o, Asəf Zeynallı adına Bakı Musiqi Kollecində təhsilini davam etdirib. Həmçinin Maqomayev 1968-ci ildə Azərbaycan Dövlət Konservatoriyasını bitirib.
O, ilk uğurunu 19 yaşında Helsinkidə, VIII Ümumdünya Festivalında qazanıb və orada medalla təltif olunub. Həmin dövrün məşhur “Oqonyok” jurnalı onun portretini və “Bakılı gənc dünyanı fəth edir” başlıqlı məqaləni dərc edib.
1961-ci ildə Müslüm Maqomayev Bakı hərbi dairəsinin mahnı və rəqs ansamblının solisti olub. 1963-cü ildə o, Kreml sarayında “Buxenvald harayı”nı ifa etdikdən sonra Sovet İttifaqında məşhurlaşıb. Rus estrada müğənnisi Klavdiya Şulyenko Maqomayev haqqında belə deyib: “Maqomayev səhnədə görünən kimi böyük bir olay oldu. O, bütün gənclərdən öndə idi. O, hamının çox xoşuna gəlirdi”.
Müslüm 1963-cü ildə Azərbaycan Dövlət Akademik Opera və Balet Teatrının solisti kimi fəaliyyətə başlamışdır. 1964-1965-ci illərdə Müslüm İtaliyada, Milan teatrı “La Skala”da təcrübə keçib. Onun ilk konserti 1966-cı ildə Parisdə baş tutub. Maqomayev ilk mükafatını, 1969-cu ildə Sopotda (Polşa) keçirilən, Beynəlxalq Mahnı Festivalında alıb.
1975-ci ildə Müslüm Azərbaycan Dövlət Estrada Simfonik Orkestrinin bədii rəhbəri təyin olunub. O, bu orkestr ilə Sovet İttifaqının müxtəlif şəhərlərində, həmçinin Fransa, Bolqarıstan, Polşa, Finlandiya, Kanada və İranda konsertlər verib.
Müğənninin repertuarına 600-dək əsər daxildir. Bu ifaların arasında “Azərbaycan”, “Ana”, “Свадьба”, “Синяя вечность”, “Bella, ciao!”, “Королева красоты” və s. kimi mahnılar var. Müslüm Maqomayev, həmçinin müxtəlif filmlərdə oynayıb.
Maqomayev SSRİ “Qırmızı Əmək Bayrağı” və “Xalqlar Dostluğu” ordenləri ilə təltif edilib, SSRİ-nin “Xalq artisti” adına layiq görülüb. O, həmçinin Azərbaycan Respublikasının “Şöhrət” və “İstiqlal” ordenləri ilə təltif edilib.
Müslüm Maqomayev 25 oktyabr 2008-ci ildə Moskvada, ürək tutmasından vəfat edib. O, Bakıda, I Fəxri Xiyabanda dəfn edilib.
