QOÇ bürcü
Qoç sanki dünyaya onu fəth etmək üçün gəlib. O, bunu bu həftə sübut edəcək və qarşısındakı ən çətin maneəni qət edəcək. Evdəki pəncərələri açın: qoy mart küləyi problemləri süpürüb aparsın. Həyatınızda yeniliklər baş verəcək: şok olaylara hazır olun, amma unutmayın ki, nə baş versə, sizin xeyrinə bitəcək. İnsanların sevgiyə olan ehtiyacı təbiətin günəşə olan ehtiyacı qədərdir: ürəyinizin qapısını açın, çünki sizi sevən biri var, lakin siz ya onu görmürsünüz, ya da “mən hazır deyiləm” deyib sevgi qatarınızı qaçırırsınız. Uğurlu günləriniz 29 fevral, 1 mart uğursuz gününüz isə 27 fevraldır.
BUĞA bürcü
Ev heyvanına sahiblənmək çoxdankı arzunuzdur? Fikirləşmədən bu həftə arzunuzu gerçəkləşdirin: həmin heyvan sizin evinizə ruzi, bərəkət gətirəcək. Axır ki, müdiriyyət sizin əziyyətlərinizi görəcək və sizə ya yeni vəzifə, ya da maaş artımı təklif edəcək. Sevgi insanın ürəyində qopan səssiz fəryaddır. Bəzən bunu sevdiyimiz insanlar da hiss etmirlər: etiraf etməkdən çəkinməyin! İnanın, ulduzlar sizə yalnız xoşbəxtlik arzu edir, lakin unutmayın ki, həyat qorxaqları sevmir. Uğurlu günləriniz 2, 3 mart uğursuz gününüz isə 26 fevraldır.
ƏKİZLƏR bürcü
Hamını mat edən, maneələrdən qorxmayan, çətinliklərin nə olduğunu bilməyən cəsur Əkizlər, niyə özünüzə inamınız itib? Həyatda problemlər ola bilər, amma bu, o demək deyil ki, ruhdan düşmək lazımdır! Oyanın, bu həftədən sonra hər şey yaxşılığa doğru dəyişəcək. Maddi tərəfdən artımlar gözlənilir, problemli məsələlər tezliklə həll olunmağa başlayacaq. Xaricdən çox maraqlı təklif ala bilərsiniz: Amerikaya və ya Avropaya gedən keçmiş tanışınızdan zəng gözləyin. Uğurlu günləriniz 26, 27 fevral uğursuz gününüz isə 29 fevraldır.
XƏRÇƏNG bürcü
Həyatınızda çox insan sizdən zəli kimi yapışıb: hər kəs də Xərçəngdən nəsə umur. Bəsdirin, bu qədər aciz olmayın! Sizin heç kəsə borcunuz yoxdur, “yox” deməyi bacarın. Bunu etsəniz, həyat sizə sürprizlər hazırlayacaq və özünüzü sanki yenidən doğulmuş kimi hiss edəcəksiniz. Həftənin ortalarında dostlarınızdan biri sizə bir sirr açacaq: onu başa düşməli və dediyini qəbul etməlisiniz. Bəzi yaralar yalnız zamanla sağalar: münasibətlərinizdə soyuqluq varsa, bir müddətlik fasilə verin. Uğurlu günləriniz 29 fevral, 2 mart uğursuz gününüz isə 27 fevraldır.
ŞİR bürcü
Həyatınıza sizin arzularınızı yerinə yetirməyə hazır olan bir insan daxil olacaq: bu şans sizə bir dəfə veriləcək, ona görə də onu torunuza salmağı bacarmalısınız. Avtomobil və ya ev almaq istəyənlər diqqətli olmalıdırlar: fırıldaqçılara rast gələ bilərsiniz. Bu səbəbdən qərar verməzdən əvvəl 100 ölçüb, 1 biçin! Sevdiyiniz üçün heç vaxt utanmamalısınız. Bilin ki, əslində utanmalı olan sevildiyini bilə-bilə sevməyi bacarmayandır: çətin olsa da, o insanı həyatınızdan buraxmalı və yeni macəralara hazır olmalısınız. Uğurlu günləriniz 2, 3 mart uğursuz gününüz isə 28 fevraldır.
QIZ bürcü
Çox insan Qızın ayaqqabısını geyə bilər, amma onun kimi yeriyə bilməz: ətrafınızda özünü sizə oxşadan, sizin yerinizdə olmaq istəyən paxıl insanlar toplaşıblar. Diqqətli olun: bu həftə tələlərlə dolu günlər keçirəcəksiniz, amma düşmənlər sizin gücünüzə bələd deyillər. Sonda “əlinizdə onların saçları, ovcunuzda dişləri qalacaq” və siz şahlar kimi taxtda oturub zəfər çalacaqsınız. Sevgi tikanlı kollarda doğular, arzuların himayəsi ile böyüyər, hörmətlə yaşamağa davam edər və qısqanclığın zəhəri ilə ölər: çalışın, sizi sevən insanın qədrini bilin, ona qarşı soyuq davranmayın. Uğurlu günləriniz 26 fevral, 2 mart uğursuz gününüz isə 1 martdır.
TƏRƏZİ bürcü
Həyat bu həftə sizə sınaqlar hazırlayıb: çətin günlər olacaq, amma güclü olsanız və maneələri dəf etsəniz, sonda böyük mükafat qazanacaqsınız. Keçmişiniz təkrarən qapınızı döyəcək: vaxtında həll etmədiyiniz problemlər sizi narahat edə bilər. Həftənin sonunda qarşınızda iki seçim olacaq: doğru seçim sizə uğur gətirəcək, səhv isə müflis edəcək. Sevgi insanlığın qanunudur, odur ki, özünüzdən: “Mən bu insanla xoşbəxtəm?” – deyə soruşun. Ömrünüzü sizə layiq olmayan bir insanla çürütməkdənsə, o insanı birdəfəlik həyatınızdan silin. Uğurlu günləriniz 29 fevral, 3 mart uğursuz gününüz isə 2 martdır.
ƏQRƏB bürcü
Bu həftə Əqrəb üçün yeniliklər dövrü başlayır: yeni peşəyə yiyələnmək, yaşayış yerini dəyişmək, cansıxan sevgilinizdən ayrılmaq və imici dəyişmək vaxtıdır. Əslində bu bürcün nümayəndələri hansı gücə malik oldularını bilmirlər: onlar ürəkdən istədikləri hər şeyi əldə edəcəklər. Lakin Əqrəbin düşməni tənbəllikdir: buna qalib gəlsəniz, inanın ki, dünyanı fəth edərsiniz. Xəzinə tapsanız, təəcüblənməyin: pul axını gözləməyə dəyər. Uğurlu günləriniz 26 fevral, 1 mart, uğursuz gününüz isə 3 martdır.
OXATAN bürcü
Çalışın, Oxatanın “quyruğunu” tapdalamayın, yoxsa önünüzdə sizi məhv edəcək bir mələyi görəcəksiniz. Bəli, unutmayın ki, şeytan da bir mələkdir. Oxatan qarşısına məqsəd qoyub və onu reallaşdırmaq üçün işlər görür, amma mərdimazarlar buna mane olmaq istəyirlər. Ətrafınızda olan insanları yoxlayın: bəlkə, sevgiliniz, ya da dost bildiyiniz bir insan sizə zərbə vurmaq istəyir? Maddi durumunuzda problemlər yaşanmayacaq, hətta artım gözlənilir. Uğurlu günləriniz 27 fevral, 2 mart uğursuz gününüz isə 29 fevraldır.
OĞLAQ bürcü
Bir çoxumuz zaman-zaman keçmişə qayıdırıq, buna görə irəliyə baxa bilmirik. Bəzən həyat davam edərkən və yeni şeylər yaşanarkən köhnədən yapışmaq asandır. Vacib məqam keçmişdə yaşadığımızın bugünkü və gələcək həyatımıza necə təsir etdiyidir. Keçmişi unutmaq və həyat kitabının növbəti səhifəsini yazmaq vaxtı gəldi: uğur və xoşbəxtlik sizi daim taqib edəcək, sadəcə cəsarətli olun. Həftəsonu iki iş təklifi arasında qala bilərsiniz: dostlarınızla və ailənizlə məsləhətləşin, onlar sizə doğru yolu göstərəcəklər. Uğurlu günləriniz 1, 3 mart, uğursuz gününüz isə 28 fevraldır.
DOLÇA bürcü
Həyatınızda çətinliklər çoxdur və bu, sizi bəzən çox sıxır: həyat sizin gücünüzü sınayır və inanın ki, bu mərhələdən alnıaçıq çıxsanız, sonra uğur daim sizi taqib edəcək. İnsanlar sevilmək üçün yaradılıblar, əşyalar isə istifadə edilmək üçün. Dünyadakı xaosun səbəbi əşyaların sevilməsi, insanların isə istifadə edilmələridir. Sizi alət kimi görməyə imkan verməyin: indikini əldən buraxmaqdan qorxmayın. Mart ayı sizin həyatınıza yeniliklər gətirəcək, problemlər həll olunacaq, işləriniz istədiyiniz kimi gedəcək. Uğurlu günləriniz 27 fevral, 2 mart, uğursuz gününüz isə 26 fevraldır.
BALIQLAR bürcü
Bu həftə hər bir məsələdə sakit olsanız, uğur qazana bilməyəcəksiniz. Bu dövrdə çətinliklər ola bilər, amma təslim olmamalısınız! “Risk etməyən şampan içməz”: yeniliklərdən qorxmayın, yeni iş təkliflərinə nəzər salın. Həftəsonu pulların içində üzəcəksiniz. Sevməyib evlənmək, inanmadan ibadət etmək kimi alçaq işdir: ürəyinizdə sevdiyiniz insan varsa, gec olmamış ona etiraf edin, yoxsa sonda peşman olacaqsınız. Uğurlu günləriniz 28 fevral, 29 fevral, uğursuz gününüz isə 27 fevraldır.
