Sabunçu rayonu, Maştağa qəsəbəsində süd məhsullarının dəhşətli vəziyyətdə hazırlandığı sex gizli şəkildə fəaliyyət göstərir.
Bu barədə Bakuplus.az redaksiyasına sakinlər məlumat verib.
Onların sözlərinə görə, sözügedən müəssisədə çürümüş südü kanalizasiya borularına axıdırlar və nəticədə ərazidən çox pis qoxu gəlir.
“Nəinki yayda, artıq indidən məhəlləni iy götürüb. Üfunətə dayanmaq mümkün olmur”, - deyə sakinlərdən biri bildirib.
Xatırladaq ki, bir neçə gün əvvəl Maştağa qəsəbəsi, Mehdi Hüseynzadə 65 ünvanında fəaliyyət göstərən, Hüseynov Ağahüseyn Kamil oğluna məxsus süd məhsullarının istehsalı müəssisəsində keçirilmiş yoxlama zamanı qida təhlükəsizliyi sahəsində bir sıra tələblərin pozulması faktları aşkarlanmış və müəssisənin fəaliyyəti nöqsanlar aradan qaldırılanadək müvəqqəti məhdudlaşdırılmışdı.
Ancaq sakinlər bildirir ki, həmin yoxlanışdan sonra sex sadəcə bir gün ərzində işləməyib. Daha sonra gizli şəkildə fəaliyyət göstərməyə başlayıb.
Problemlə bağlı Azərbaycan Qida Təhlükəsizliyi Agentliyinə (AQTA) sorğu ünvanladıq.
Qurumdan bildirildi ki, məsələ tezliklə nəzarətə götürüləcək:
“Belə hallar olan zaman sakinlər agentliyə müraciət, 1003 qaynar xəttinə zəng edə bilərlər”.
Sara Məmmədli
