Sentyabr ayından etibarən tək ibtidai sinif şagirdləri deyil, yuxarı sinif şagirdləri də vahid məktəbli forması geyinəcəklər. Bu onu deməyə əsas verir ki, forma alışı zamanı yenə sıxlıq yaşana bilər. Bu haqda bu gün, 13 iyul tarixində Bakuplus.az Baku TV-yə istinadən məlumat verir.
Bakı Tikiş Evindən bildirilib ki, bu il forma qıtlığının yaşanmaması üçün Bakıda 9 satış mərkəzi fəaliyyətə başlayıb. Bundan başqa, ətraf rayonlarda da satış mərkəzləri açılacaq.
Bakı Tikiş Evinin satış üzrə müdiri Etibar Əzimov bildirdi ki, fabrika məktəbli formalarını 3 rəngdə tikir. Hər gün 1000-dən 2000-ə kimi forma istehsal olunur və bu tədris ilində formaların qıtlığı müşahidə edilməyəcək.
Paytaxtda məktəbli formalarının təminatçısı Bakı Tikiş Evi və Bakı Tekstil Fabrikidir. O zaman təxmini hesablarla təkcə Bakı Tikiş Evinin sexləri günə təqribən 1500 məktəbli forması istehsal edərsə, bu, ayda 45.000 geyim deməkdir. 2022-2023-cü tədris ilində Bakı şəhəri üzrə təhsil idarəsinin tabeliyində olan məktəblərdə təqribən 483.000 şagird təhsil alıb.
Hər iki fabrik ay ərzində eyni sayda məhsul istehsal etsə, sadəcə 90.000 məktəblini forma ilə təmin etmək mümkün olacaq. Tədris ilinə isə cəmi 2 ay vaxt qalıb, yəni sözügedən müəssisələr nə qədər qıtlıq olmayacağını bildirsələr də, istehsal həcmi tələbatı ödəyə bilməyəcək. Bu halda valideynlərin edə biləcəyi tək şey indidən forma almaqdır.
“Gəlib-gedən də yoxdur. Heç kim qapını açmır. Nə vaxt bir həftə qalacaq məktəbin açılmağına, o zaman camaat töküləcək. Biz də böyük miqdarda tikib saxlaya bilmirik, çünki biz kreditlə işləyirik: nə qədər tikdik, o qədər satılsın ki, biz krediti ödəyə bilək.
Biz o iş üçün məsuliyyət daşımırıq. Biz özəl müəssisəyik, biz sadəcə istehsal edirik, çıxarırıq bazara. Nə qədər bəs edəcək, bəs etməyəcək, bunu mən deyə bilmərəm”, - Etibar Əzimov bildirib.
Elm və Təhsil Nazirliyi də məsələyə pozitiv yanaşır.
“Bu, sahibkarlıq subyektlərinin işidir və məktəbli formalarının daha çox tikilməsi və onların müxtəlif ticarət obyektlərində satışının təşkilini sahibkarlıq subyektləri həll edir. Güman edirəm ki, növbəti mövsümdə bununla bağlı hər hansı problem olmayacaq”, - deyə Elm və Təhsil Nazirliyinin sözçüsü Cəsarət Valehov qeyd edib.
Məktəbli formalarının qiymətinə gəlincə köynəklər 15 manat, ətək və şalvarlar 25 manat, jaketlər isə 30 manatdır. 2022-ci ildə Nazirlər Kabinetinin verdiyi qərara əsasən, bu formaların seçilib-seçilməməsini məktəbin pedaqoji şurası müəyyən edir.
