Bakının Binəqədi rayonu, Azadlıq prospektində sakinlər piyada keçidinin olmamasına görə şikəyətçidirlər. Bu haqda bu gün, 27 aprel tarixində Bakuplus.az ATV-yə istinadən xəbər verir.
Azadlıq prospekti ilə Süleyman Sani Axundov küçələrinin kəsişməsində piyada keçidi olmadığı səbəbindən yol qəzası baş verir. Vətəndaşlar yolun əks-tərəfinə keçmək üçün hər dəfə həyatlarını təhlükəyə atırlar.
Sakinlərin sözlərinə görə, yaxınlıqda keçid olub, lakin onu ləğv ediblər. Digər keçid isə onlardan uzaqdır və bəzi insanlar ora getməkdə çətinlik çəkirlər.
“Dəfələrlə yol qəzaları baş verib. Bir müddət öncə 2 nəfəri maşın vurub. 1 nəfər ölüb, digəri isə ağır vəziyyətdə xəstəxanaya yerləşdirilib”, – deyə sakin qeyd edib.
Azərbaycan Yerüstü Nəqliyyat Agentliyindən (AYNA) verilən məlumata görə, avtomagistralların yaşayış məntəqələrindən keçən hissələrində yerüstü və yeraltı keçidlər arasında məsafə 400-800 metr, yaşayış məntəqələrindən keçən hissələrində isə piyada keçidləri arasında məsafə 150-300 metr olmalıdır.
“Azadlıq prospektindəki Heydər Əliyev parkı yaxınlığında piyada keçidinin təşkili üçün layihə hazırlanaraq Nəqliyyatın əlaqələndirmə şurasında razılaşdırılıb. Layihənin icrası zamanı Azadlıq prospektində də piyada keçidi təşkil ediləcək”, – deyə AYNA-nın mətbuat katibi Tural Orucov bildirib.
