Ötən ay bıçaqlanaraq öldürülən 20 yaşlı tələbə Hikmət Kərimovun iki özəl xəstəxanaya qəbul olunmaması bildirilir. Bu haqda bu gün, 6 iyul tarixində Bakuplus.az Xəzər Xəbər-ə istinadən məlumat verir.
Oğlanın atası İlham Kərimov bildirir ki, hadisə baş verdikdən sonra onu iki özəl klinikaya aparsa da, hər birində: “İcazəmiz yoxdur”, - deyərək onu qəbul etməyiblər.
“Funda” klinikasından bildirildi ki, tibb müəssisəsinin təcili tibbi yardım xidməti yoxdur. Klinika yalnız ambulator və planlı tibbi cərrahiyə əməliyyatlarını axsam saat 5-ə kimi aparır.
“Zəfəran” klinikasından heç bir açıqlama verilməyib.
Digər özəl klinikalardan qeyd edilib ki, təcili tibbi yardım xidməti varsa, yaralı xəstə qəbul edilir, ona ilkin yardım edilir, dərhal hüquq-mühafizə orqanlarına məlumat verilir.
Məsələyə TƏBİB-in koordinasiya departamentinin müdiri Mübariz Ağayev də münasibət bildirib: “Təcili hallarda istənilən xəstəxana, istər tabeliyimizdə olan, istərsə də özəl xəstəxanalar xəstəni qəbul etməyə borcludur. Səhiyyə müəssisələri, özəl müəssisələr qarşılıqlı şəkildə TƏBİB ilə əməkdaşlıq edir, İcbari tibbi sığorta ilə əməkdaşlıq edir, müqavilələri var. İstənilən halda, təxirəsalınmaz halda xəstəyə yardım göstərilməlidir”.
Səhiyyə Nazirliyindən isə bildirildi ki, vətəndaşlara təcili və təxirəsalınmaz tibbi yardım, təcili tibbi müdaxilə tələb edilən hallarda, bədbəxt hadisələr, travmalar, zəhərlənmələr və digər xəstəliklər mülkiyyət formasından asılı olmayaraq, təcili yardım tibb müəssisəsi tərəfindən göstərilir.
DİN-dən də açıqlanma verilib ki, nazirlik tərəfindən özəl xəstəxanalara belə qadağa və ya məhdudiyyət qoyulmayıb.
