Bakının Xətai rayonunda yerləşən “Ayşənim” bağçasında tərbiyəçi uşağa yemək yedizdirən zaman şiddət göstərib. Bunu əks etdirən videogörüntülər sosial şəbəkələrdə yayılıb. Bağçanın rəhbəri Gülşən Əsədova həmin məsələ ilə bağlı açıqlama verib. Bu haqda bu gün, 16 mart tarixində Oxu.az məlumat verib.
Onun sözlərinə görə, tərbiyəçi Pərvanə xanımın körpəyə kobudluq göstərmək fikri yox idi.
“Həmin uşaqda autizm xəstəliyi var. Psixoloq da deyir ki, belə uşaqlar nəyə isə reaksiya verməyəndə ehmalca toxunuş edin. Pərvanə xanım da onun əlinə kobud yox, ehmalca vurur. Həmin tərbiyəçi iki ildir, bizimlə çalışır, amma ümumi dörd illik təcrübəsi var. Valideyn uşağını başqa bağçanı bəyənmədiyi üçün bizə gətirib. Azyaşlı o qədər qorxa-qorxa gəlirdi ki, Pərvanə xanım üç ay onun şəxsi müəllimi olub, qucağında yatırdıb. Niyə indi ondan narazılıq edilir ki?” - deyə Əsədova bildirib.
Onun sözlərinə görə, anası tərbiyəçini işdən çıxarmağı tələb edib. Pərvanə adlı tərbiyəçi ilə bağlı qərar bağçada keçiriləcək iclasda veriləcək.
Məsələ ilə bağlı Daxili İşlər Nazirliyi də araşdırma aparır.
