Bakıda 1 otaqlı mənzillər tapmaq çətinləşib. Bu haqda bu gün, 23 iyun tarixində Bakuplus.az Report-a istinadən xəbər verir.
Belə ki, daşınmaz əmlaka yatırım edənlərin çoxu 1 otaqlı mənzillərə üstünlük verir.
“Birotaqlı mənzil alanlar onu 2 otaqlıya çevirib, yaşayış üçün komfort vəziyyətə gətirir və kirayə bazarına təklif edirlər. Kirayə bazarının əsas müştəriləri də tələbələr və yeni qurulmuş ailələrdir. Bu baxımdan bazarda hazırda birotaqlı mənzillərin qıtlığını hiss edirik”, - deyə Azərbaycan Qiymətləndiricilər Cəmiyyətinin sədri Vüqar Oruc bildirib.
Onun sözlərinə görə, eyni binada 1 otaqlı və 3 otaqlı mənzillər üzrə müqayisə aparsaq, görərik ki, 1 otaqlı mənzillərin kirayəyə verilmə faizi çox otaqlılardan təqribən 50% çoxdur.
“Hazırda Bakıda köhnə binalara nisbətən yeni tikili binalarda 1 otaqlı mənzilləri tapmaq daha asandır. 1 otaqlı mənzillər getdikcə daha da azalacaq. Çünki bunlar iri investisiya layihələri üçün məqsədəuyğundur”, - deyə V.Oruc əlavə edib.
