Sosial şəbəkələrdə qazi olduğu deyilən 29 yaşlı Heydər adlı gəncin 16 yaşlı Aynurla evlənməsi ilə bağlı məlumat yayılıb. Bunu telekanallardan birində canlı yayımda bəyin anası da təsdiqləyib. Qadın əlavə edib ki, bunun üçün bütün məsuliyyəti bəyin ailəsi öz üzərinə götürür. Bu haqda bu gün, 28 aprel tarixində Oxu.az məlumat verib.
Ailə Xırdalan şəhərində yaşayır və toy 3-4 gün əvvəl paytaxtın Yasamal rayonundakı şadlıq saraylarının birində olub.
Bununla bağlı Daxili İşlər Nazirliyinə (DİN) və Ailə, Qadın və Uşaq Problemləri üzrə Dövlət Komitəsinə müraciətlər edilib.
Ailə, Qadın və Uşaq Problemləri üzrə Dövlət Komitəsinin mətbuat xidmətinin rəhbəri Teymur Mərdanoğlu bildirib ki, daxil olan sorğu əsasında araşdırma aparılıb: “Məlum olub ki, yetkinlik yaşına çatmayan qızın toyu Yasamal rayonunda olsa da, sakinlər Xırdalan şəhərində yaşayırlar. Məsələ ilə bağlı aidiyyəti üzrə Abşeron Rayon İcra Hakimiyyətinə və Daxili İşlər Nazirliyinə məlumat verilib. Məsuliyyəti üzərinə götürdüyünü deyən ananın Abşeron Rayon İcra Hakimiyyəti yanında Yetkinlik yaşına çatmayanların işləri və hüquqlarının müdafiəsi üzrə komissiya tərəfindən aidiyyəti üzrə dəvət ediləcəyi və profilaktik söhbət aparılacağı bildirilib”.
DİN-in rəsmisi Nurlan Əliyev qeyd edib ki, adıçəkilən şəxslərin nikahı rəsmi qeydə alınmayıb. Onun sözlərinə görə, vətəndaşın 16 yaşı olduğu üçün bu əməldə cinayət tərkibi yoxdur. “Faktla bağlı Abşeron Rayon Polis İdarəsində araşdırmalar davam etdirilir”, - deyə Əliyev əlavə edib.
