Bakıda 2 yaşlı uşağın bağçada döyüldüyü iddia olunur. Bu haqda bu gün, 6 aprel tarixində Bakuplus.az İctimai TV-yə istinadən xəbər verir.
Fidan İmaməliyeva paytaxtın özəl bağçalarından birinə öz 2 yaşlı övladını əmanət edib. Ancaq bir gün uşağının başından zədələndiyini görüb. Bağça işçilərindən məsələni aydınlaşdırmaq istədikdə isə kobud cavab alıb.
“Uşağı bağçadan götürəndə görürəm ki, başında hematoma var. Səbəbini işçilərdən soruşanda uşağı üstümə atıb kobud şəkildə: “Götürün uşağınızı. Biz sizə dedik də, niyə gəlib götürmədiniz vaxtında?” - deyə cavab verdilər.
F.İmaməliyeva bildirir ki, bağçada antisanitariya var, bu səbəbdən də uşağını oradan çıxartmağa qərar verib. Uşağın bağçadakı son günündə işçilər ona uşağı dərhal götürməsini, əks halda çölə atacaqlarını deyərək hədələyiblər.
Bağçanın müdiri məsələ ilə bağlı açıqlayıb ki, uşağın başı çarpayıya dəyib və döyülmə ilə bağlı iddialar yalandır.
“Uşaq yataqdan qalxanda alnı çarpayıya dəyib. Anasına da bununla bağlı məlumat verilib. Epidemioloji vəziyyət barədə isə burada ildə 2-3 dəfə yoxlama olur”.
“Hazırda məsələyə məhkəmə baxır və yaxın zamanda kimin haqlı, kimin haqsız olduğu bəlli olacaq”, - deyə müdir əlavə edib.
