Son vaxtlar Bakıda günün istənilən saatında tıxaclara rast gəlmək olar. Ən çox sıxlıq isə orta məktəblərdə dərslərin başlama və bitmə saatlarında yaranır. Bu haqda bu gün, 6 aprel tarixində Bakuplus.az APA TV-yə istinadən məlumat verir.
Hazırda Bakı şəhəri üzrə 320 orta ümumtəhsil məktəbində 470 min şagird təhsil alır. Bu isə on minlərlə maşının eyni vaxtda yollara çıxması deməkdir.
Təhsil eksperti Kamran Əsədov deyir ki, valideynlərin əksriyyəti şəxsi avtomobillərdən istifadə edir, nəticədə dərs saatlarında sıxlıq həddindən çox artır.
Nəqliyyat eksperti Elməddin Muradlı isə problemin təhsil sisteminin yenilənməməsində görür.
Problemin aradan qaldırılması üçün mütəxəssislərin əsas təklifi dərslərin fərqli saatlarda başlamasıdır. Ancaq artıq bir neçə ildir ki, bu təklif müxtəlif səviyyələrdə səsləndirilsə də, reallaşdırılmır.
Daxili İşlər Nazirliyinin Baş Dövlət Yol Polisi İdarəsindən bildirildi ki, problemlə bağlı onlara hansısa layihə təklif olunmayıb. Nazirlik bu sahədə aidiyyəti qurumlarla işləməyə hazırdır.
Elm və Təhsil Nazirliyindən isə dedilər ki, mövcud problemlə bağlı maarifləndirmə işləri aparılıb. Ancaq problem həllini aidiyyəti qurumların birgə səyi nəticəsində tapa bilər.
