Bakıətrafı ərazilərin əksəriyyətində insanlar elektrik enerjisinin çatışmazlığından əziyyət çəkirlər. Bu haqda bu gün, 12 avqust tarixində Bakuplus.az ARB Xəbər-ə istinadən məlumat verir.
Uzun müddətdir elektrik enerjisini 90-cı illərdə olduğu kimi, fasilələrlə alan Binəqədi rayonu, Biləcəri qəsəbəsi, döngə 7 sakinləri də vəziyyətdən narazıdırlar. Onlar bildirirlər ki, elektrik gərginliyi aşağı olduğuna görə evdə heç bir elektrik qurğulardan istifadə etmək mümkün deyil. Kondisionersiz qalan vətəndaşlar avtomobillərdə yandırılmış kondisionerlə yatmağa məcbur qalıblar.
Məsələdən “Azərişıq” ASC də xəbərdardır. Qurum problemin səbəbini qeyd olunan yaşayış massivlərində elektrik xətlərinin həddindən çox yüklənməsi ilə əlaqələndirir.
“Hava şəraitinin isti, hətta anomal isti keçməsi ilə əlaqədar olaraq bəzi lokal yaşayış məntəqələrində elektrik enerjisində fasilələr müşahidə olunur. Bunun da başlıca səbəbi plansız və şəhərsalma prinsiplərinə uyğun olmayan yeni yaşayış massivlərinin salınmasıdır. Massivlər güc mərkəzlərindən kənarda yerləşdiyi üçün müəyyən mənada həm özlərinin elektrik enerji təchizatını, həm digər istehlakçıların elektrik enerjisi təchizatında müəyyən problemlər yaranır”, – deyə “Azərişıq” ASC-nin Tədris və İnnovasiyalar Mərkəzinin direktoru Araz Məmmədzadə qeyd edib.
Əgər yaşayış məntəqəsində 2 min abonent varsa, elektrik təsərrüfatı da həmin saya uyğun quraşdırılır. Amma durmadan artan əhali sayı həmin infrastruktura uyğunlaşmır. Bu da enerji xətlərində ciddi yükləmələrlə nəticələnir.
Bu günlərdə respublika üzrə ən yüksək göstərici qeydə alınıb. Burada söhbət elektrik enerjisinin istehlakından gedir. 10 avqust tarixində respublika üzrə 79,8 milyon kilovat/saat elektrik enerjisindən istehlak edilib. Bu da ən yüksək göstərici hesab edilir.
Qurum mövcud problemin növbəti il baş verməməsi üçün hazırda elektrik enerjisi ilə tam təmin olunmayan yaşayış yerlərində komplekt transformator məntəqələrinin sayını artıracaq. O ki qaldı hazırda yaşanan problemin həllinə, “Azərişıq” ASC-nin Tədris və İnnovasiyalar Mərkəzinin direktoru bildirdi ki, ilk olaraq sakinlər elektrik avadanlıqlarından fasilələrlə istifadə etməlidilər ki, ciddi yükləmələr aradan qalxsın. Elektrik enerjisinin verilişində məhdudiyyət yarandığı halda isə dərhal qurumun 199 çağrı mərkəzi ilə əlaqə saxlayıb məlumat vermələri xahiş olunur.
