Bakıda özünü polis kimi təqdim edən şəxs 30 taksi sürücüsünün pulunu alıb. Bu haqda bu gün, 25 aprel tarixində Bakuplus.az Daxili İşlər Nazirliyinin (DİN) mətbuat xidmətinə istinadən məlumat verir.
Taksi sürücülərinin etibarından sui-istifadə edərək, onları dələduzluq yolu ilə aldadaraq müxtəlif məbləğlərdə pul ələ keçirən paytaxt sakini Zeynalabdin Məlikzadə saxlanılıb. Əməliyyatı Binəqədi rayon Polis İdarəsinin əməkdaşları keçiriblər.
Araşdırmalar zamanı müəyyən edilib ki, Məlikzadə, əsasən, iri supermarketlərin yaxınlığında taksi şirkətlərinə internet vasitəsilə sifariş verib. Taksi yerinə gələndə sürücülərlə əlaqə saxlayıb və özünü polis əməkdaşı kimi təqdim edib. Onlardan işdən çıxıb marketdən ərzaq almağı, həmçinin internet balansını artırmaq adı ilə elektron pul kisəsinə vəsait köçürmələrini istəyib. Zeynalabdin Məlikzadə taksi sürücülərinə bildirib ki, guya işlədiyi polis bölməsinə çatanda pulu qaytaracaq.
Zərərçəkənlər Zeynalabdin Məlikzadənin dediyi polis bölməsinə müraciət etdikdə aldadıldıqlarını anlayıblar.
Saxlanılan şəxs onunla əlaqə saxlamamaqları üçün taksi sürücülərinin telefonlarını bloklayıb. O, zərərçəkmişlərin elektron pul kisəsinə qoyduğu pul vəsaitlərini müxtəlif proqramlar vasitəsilə nağdlaşdıraraq mənimsəyib.
Zeynalabdin Məlikzadə əvvəllər də daşınmaz əmlak saytlarında saxta elanlar yerləşdirməklə vətəndaşları aldatmaqda təqsirli bilinib.
Onun əməllərindən zərər çəkən başqa vətəndaşlar varsa, Daxili İşlər Nazirliyinə, Binəqədi Rayon Polis İdarəsinə, "102" Xidməti - Zəng Mərkəzinə və ya nazirliyin sosial şəbəkələrdəki rəsmi səhifələrinə müraciət edə bilərlər.
