Bakıda yerli əhəmiyyətli memarlıq abidəsi sayılan ilk ixtisaslaşdırılmış xəstəxana binasının yarısı sökülüb. Bunu Facebook səhifəsində tanınmış memar, sənətşünaslıq doktoru, professor Elçin Əliyev deyib.
Onun sözlərinə görə, keçmiş Mixaylovskaya xəstəxanasının, indiki Bakı şəhəri 1 saylı doğum evinin binası paytaxtın Nəsimi rayonu, Əlimərdan bəy Topçubaşov küçəsi, 77 ünvanında yerləşir.
“Bina 1888-89-cu illərdə “Nobel Qardaşları” şirkətinin vəsaiti hesabına tikilib. Layihənin müəllifi alman memar Nikolaus fon der Nonnedir. Xəstəxananın təntənəli açılışı 1889-cu il noyabrın 8-də olub və uzun illər bu xəstəxana Bakı sakinlərinə xidmət edib. Dövlət tərəfindən qorunan memarlıq abidəsinin düz yarısı sökülüb”, - deyə Əliyev bildirib.
Memar iddia edir ki, söküntü işləri yaxınlıqda yeni tikilmiş müasir bina üçün parkinq tikmək məqsədilə aparılıb.
Bununla bağlı Azərbaycan Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətindən bildirilib ki, son illər paytaxtımızın heç bir yerində tarixi abidənin sökülməsi hallarına rast gəlinməyib.
“Tarix-memarlıq abidələrinin mühafizəsi işi aidiyyəti dövlət orqanlarının ciddi nəzarətindədir”, – deyə qurumdan bildirilib.
Keçmiş Mixaylovskaya xəstəxanasının binası “Yerli əhəmiyyətli tarix və mədəniyyət daşınmaz abidələrinin siyahısı”na daxil edilib (inventar nömrəsi 3006).
