Bakının Binəqədi rayonu, Ağasadıq Gəraybəyli küçəsində güclü külək nəticəsində irigövdəli qurumuş ağac üç avtomobilin üzərinə aşıb. Bu haqda bu gün, 11 yanvar tarixində Bakuplus.az ATV Xəbər-ə istinadən məlumat verir.
Hadisə nəticəsində xəsarət alan olmayıb, avtomobillərə ciddi maddi ziyan dəyib. Zərərçəkənlərin sözlərinə görə, avtomobillərinə dəyən ziyanı heç kim qarşılamır.
Zərərçəkənləri ən çox narahat edən ağacların qurumasıdır. Onların sözlərinə görə, onlar gələcəkdə bu kimi halın təkrarlanmasından sığortalanmayıblar.
Məsələ ilə bağlı Bakı şəhər Yaşıllaşdırma Təsərrüfatı Birliyindən bildirildi ki, quruyan ağaclar barədə Ekologiya və Təbii Sərvətlər Nazirliyinin (ETSN) müvafiq rəyi olmadığından onlar ərazidən götürülə bilməz.
ETSN-dən isə deyildi ki, ağacların quruması ilə bağlı quruma heç bir məlumat daxil olmayıb. Əlavə edildi ki, qurumuş ağacların ərazidən götürülməsi üçün yerli icra orqanları və bələdiyyə tərəfindən nazirliyə rəsmi müraciət edilməlidir.
