Son 5 ildə Bakıda işıqlandırılan küçələrin sayı 2 dəfə artıb. Bu haqda bu gün, 13 iyun tarixində Bakuplus.az Bakı Şəhər İcra Hakimiyyəti başçısı Aparatı şəhər təsərrüfatı şöbəsinin müdiri Ayaz Hüseynova istinadən məlumat verir.
Belə ki, 2018-ci ildə Bakı şəhərində işıqlandırılan küçələrin sayı 1216 idisə, 5 ildə bu rəqəm 2466-ya yüksəlib.
Ötən ilin sonlarında başlanan küçələrin işıqlandırılması işləri çərçivəsində nəzərdə tutulan yeni layihəyə əsasən, 548 küçədən 320-si artıq tamamlanaraq istifadəyə verilib.Qalan küçələrdə isə işlər davam etdirilir.
Yeni salınmış küçələrin işıqlandırılması ilə paralel olaraq, mövcud 82 küçənin istismar müddəti başa çatmış işıqlandırma xətləri və elektrik dirəkləri yeni, müasir sistemlərlə əvəz edilmişdir. İşlər mərkəzlə yanaşı, qəsəbələrdə də aparılır.
Yeni quraşdırılmış işıq dirəkləri ənənəvi lampalardan 50 faiz daha səmərəli olan LED lampalarla təchiz edilmişdir. Bundan əlavə, bu işıqlar uzun xidmət müddətinə malik olduğundan tez-tez texniki xidmət göstərməyə ehtiyac yoxdur. Digər üstünlük isə bu işıqların vahid idarəetmə sisteminə qoşulmasıdır.
Buna baxmayaraq, Zığ-Hövsan avtomobil yolunda neçə müddətdir ki, işıqlandırma sistemi mövcüd deyil. Cəmi 2 həftə əvvəl gecə saatlarında yolu keçən ailəni avtomobil vurub. Nəticədə ana, 6 yaşlı uşaq və nənəsi hadisə yerində dünyalarını dəyişiblər.
