Bakıda köhnə avtobusların sürücüləri hər gün təhlükə saçırlar. Bu haqda bu gün, 20 aprel tarixində Bakuplus.az ATV-yə istinadən xəbər verir.
Belə ki, nağd ödənişlə işləyən 592 saylı avtobuslar digər sərnişindaşımalara daim maneçilik törədir, qəsdən yeni avtobuslara ziyan vurur, onların yollarına girir. Sürücülər iddia edirlər ki, buna səbəb 592 saylı avtobus sürücülərinin daha çox sərnişin daşımaq və daha çox pul qazanmaq istəyidir.
“İmkan vermirlər işləməyə. Qabağımızı kəsirlər və dayanacaqdan gec çıxırlar”, - deyə “BakuBus”ın sürücüsü qeyd edir.
592 saylı avtobusların sürücüləri məsələ ilə bağlı cavab verməkdən imtina etdilər. Həmin avtobusların sahibləri isə öncə məsələni araşdıracaqlarını bildirdilər, daha sonra isə cavab vermədilər.
Azərbaycan Yerüstü Nəqliyyat Agentliyi (AYNA) məsələ ilə bağlı vurğulayıb ki, sahibkarla artıq profilaktik söhbətlər aparılıb və xəbərdarlıq edilib.
