Bakıda yeni parkinq qaydaları tətbiq olunsa da, “parkovşik”lər yenə də fəaliyyətlərini davam etdirirlər. Bu haqda bu gün, 21 avqust tarixində Bakuplus.az Azərbaycan Yerüstü Nəqliyyat Agentliyinə (AYNA) istinadən məlumat verir.
Verilən məlumata görə, parkinq haqqı onlayn ödənişə keçirilsə də, “parkovşik”lər sürücülərdən nağd pul tələb edirlər.
AYNA-dan bildirilib ki, parklanmaya görə nağd ödənişlər qanunsuzdur: “7 avqust tarixindən etibarən nəqliyyat vasitələrinin parklanmasına görə nəzərdə tutulan ödənişlərin yığımı yalnız nağdsız qaydada həyata keçirilir.
Belə ki, küçə parklanma yerlərindən istifadəyə görə sürücülərdən nağd şəkildə hər hansı bir ödəniş tələb oluna bilməz. Sürücülərə bunu nəzərə almalarını və qanunsuz ödənişlər etməməyi tövsiyə edirik. Sürücülərdən parklanma adı ilə nağd pul tələb edilməsi tam qanunsuzdur”.
Sürücülər park etdikdən dərhal sonra mobil tətbiqi açmalı və parklamanın başlandığını təsdiqləməlidirlər. SMS-lə ödəniş etmək istəyənlər parklanmaya başlayanda 1181 qısa nömrəsinə avtomobilin dövlət nömrə nişanını, parkinq nömrəsini və parkinq yerini bildirməlidirlər. Əks-halda sürücülər cərimələnəcəklər. Parklanma yeri kimi müəyyən edilməyən yerlərdə avtomobillərini park edənlər də cərimələnəcəklər.
Dayanacaqlarda müəyyən edilmiş parklanma qaydalarına riayət olunması, ödənişlərin yerinə yetirilməsinə nəzarət, o cümlədən ərazidə maarifləndirmə və məlumatlandırma işlərinin aparılması məqsədilə prosesə nəzarətçilər, o cümlədən “Nəqliyyat könüllüləri” cəlb olunublar.
Tətbiqin “Fərdi parklanma talonu” bölməsi vasitəsilə avtomobillərin parkinq yerlərinin təşkil olunduğu yol kənarlarında yerləşən ev və ya binalarda yaşayan avtomobil istifadəçiləri pulsuz parkinq üçün müraciət edə bilərlər. Həmçinin gündə bir dəfə 15 dəqiqəyə qədər parklanma və bazar günlərində küçə parkinqi pulsuzdur.
Mobil tətbiqi həm App Store, həm də Google Play Store-dan yükləmək olar.
