Sabunçu rayonunun Bakıxanov qəsəbəsi, Mahir Əmirov küçəsində sakinlər 30 ilə yaxındır ki, bünövrəsi zədələnmiş binada yaşayırlar. Bu haqda ATV Xəbər reportaj hazırlayıb.
Bina, təxminən, 30 il əvvəl keşmiş qaçqınlar və məcburi köçkünlərin istifadəsinə verilib. Ancaq bina antisanitar və baxımsız vəziyyətdə qalıb. Burada yaşayan sakinlər dəfələrlə aidiyyəti qurumlara müraciət etsələr də, heç bir nəticə əldə edilməyib.
Məsələ ilə bağlı Sabunçu Rayon İcra Hakimiyyətindən bildirildi ki, problemin aradan qaldırılması üçün aidiyyəti qurumlara müraciət edilib. Qaçqınların və məcburi köçkünlərin işləri üzrə dövlət komitəsindən isə bildirildi ki, heç bir keçmiş məcburi köçkün paytaxtda yeni binaya köçürülməyəcək.
Qaçqınların və məcburi köçkünlərin işləri üzrə Dövlət Komitəsinin İctimaiyyətlə əlaqələr və mətbuat rəhbəri İbrahim Mirzəyev xəbər verib ki, dövlət komitəsinin mənzil fondunda boş yaşayış sahələri yoxdur. Eyni zamanda, məcburi köçkünlər üçün yeni yaşayış sahələri inşa edilmir. Onlar üçün mənzillər bundan sonra yalnız işğaldan azad edilmiş ərazilərdə tikiləcək. Məcburi köçkünlərin öz daimi yaşayış yerlərindən mərhələli şəkildə qayıdışı zamanı, ilk növbədə, ən ağır vəziyyətdə yaşayanlar yeni yaşayış sahələri ilə təmin olunacaqlar.
Jurnalistlərin qəzalı binanın taleyi ilə bağlı Fövqəladə Hallar Nazirliyi ilə əlaqə saxlamaq cəhdi uğursuz alınıb, zənglərə cavab verən olmayıb.
[caption id="attachment_46769" align="alignnone" width="800"]
Foto Atv-nin rəsmi Youtube kanalı[/caption]
