Dünyanın bir çox ölkələri öz küçə yeməkləri ilə məşhurdur. Azərbaycanda da “fast food” kimi tanınan yeməklər olduqca çox istifadə edilir. Bu kateqoriyadan olan yeməklərə Azərbaycanın milli yeməkləri də əlavə ediləcək. Bu barədə xüsusi konsepsiya hazırlanır. Bu haqda bu gün, 21 avqust tarixində Bakuplus.az Azərtac-a istinadən məlumat verir.
Azərbaycan Turizm Agentliyinin hazırladığı küçə yeməkləri ilə bağlı konsepsiyada daha çox milli yeməklərimizin təamları yer alır. Bu yeməklər kompakt şəkildə hazırlanaraq şəhər sakinlərinə və şəhərin qonaqlarına təqdim olunacaq. Bunu Qastronomiya turizminin idarə edilməsi sektorunun müdiri Səkinə Əsgərova deyib.
Küçə yeməkləri konsepsiyasının əsas hədəf kütləsi turistlər olsa da, bu layihənin həyata keçirilməsi yerli sakinlərin də ürəyincədir.
Qastroenteroloq Mətanət Cəfərova deyir ki, bu kimi yeməklərin hazırlanması və istifadəsi zamanı xüsusi standartlara əməl etmək lazımdır.
“Əgər bu, yol kənarındadırsa, orada davamlı maşınların hərəkəti varsa, sıx insan hərəkəti varsa, tozlu bir yerdirsə, bu yeməklərdə biz gigiyenaya fikir verməliyik, çünki bakterial çirklənmə olacaq. Bununla bağlı yenə mədə-bağırsaq traktında bir pozulmalar, ishal, qusma özünü göstərəcək. 2-ci növbədə küçə yeməkləri, məsələn bizim milli mətbəxdə qutabı götürsək, bu zaman istifadə olunan yağa diqqət vermək lazımdır. Qastrit, xorası olanlar, kuliti olanlar üçün hədsiz çox istifadəsi əlverişli sayılmır”, - həkim əlavə edib.
Bildirilir ki, milli yeməklərdən ibarət küçə yeməkləri layihəsinin icrasına 2024-cü ildən başlanılacaq. Azərbaycanın milli yeməklərinin də bu siyahıdan olan sırada satılması ölkəyə gələn turistlərin də yeməklərmizi tanımasına imkan yaradır.
