Bakıda institut köçürülür. Bu haqda bu gün, 7 aprel tarixində Bakuplus.az APA-ya istinadən xəbər verir.
Mərkəzi Nəbatat bağında yerləşən Botanika İnstitutunun bağda aparılan yenidənqurma işləri çərçivəsində köçürülməsi planlaşdırılır. Ancaq təhsil müəssisəsindən bildirilir ki, köçürülmə prosesi çox çətin olacaq.
“Əvvəl bizə demişdilər ki, bina köçürülməyəcək və sadəcə olaraq üzlənəcək. Biz də köçürülməyəcəyimizə əmin olduqdan sonra birinci mərtəbədə bərbad vəziyyətdə olan laboratoriyalarımızı direktorun təşəbbüsü ilə təmir etdik. İndi podratçılar deyirlər ki, bina müvəqqəti olaraq başqa bir yerə köçürülməlidir, daha sonra yeni bina tikiləcək.
İnstitutun çox zəngin herbari fondu, zəngin kitabxanası, bahalı laborator cihazları var. Bizim 1932-ci ildən bəri yığılan nüsxələrimiz, nadir bitki fondumuz var. Burada Qarabağa aid nümunələr də yer alır. Hansı ki həmin növlərin bəziləri hazırda yoxdur. Bu köçürülmə çox çətin prosesdir. Köçürülmə olacaqsa, proses bir dəfəyə müvafiq şkaflar hazırlandıqdan sonra edilməlidir”, - deyə Botanika İnstitutunun elmi katibi, biologiya üzrə fəlsəfə doktoru Xuraman Xəlilova bildirib.
O, əlavə edib ki, Mərkəzi Nəbatat Bağının 44 hektar sahəsinin 4 hektardan çoxu rəsmi şəkildə Botanika İnstitutuna aiddir. Buna dair sənədlər də var. Lakin bağın köçürülməsinə aid sənədlərdə bu 4 hektardan söhbət belə getmir.
Mərkəzi Nəbatat bağından məsələ ilə bağlı bildiriblər ki, Mərkəzi Nəbatat Bağının tərtib olunmuş xəritəsi, kadastr planı var. Burada göstərilir ki, bağ 46 hektara yaxın əraziyə malikdir. Burada ayrı heç bir təşkilatın yeri ola bilməz. Olubsa da, qanunsuzdur. Həmçinin bağın gələcəyinə zərər vuran bütün binaların kənara köçürülməsi daha məqsədəuyğundur.
