Nizami rayonunda 33 yaşlı şəxs kafedə xadimə işləyən bibisi qızını öldürməyə cəhd edib. Bu haqda 5 oktyabr tarixində BAKU.WS məlumat verib.
2021-ci il avqustun 13-də Keşlə qəsəbəsindəki “Məhəllə” adlı kafedə Elmir (şərti ad) orada xidmətçi işləyən Səbinənin (şərti ad) işdən çıxmasını tələb edib. Səbinə isə savadsız olduğunu və başqa yerdə iş tapa bilmədiyi üçün kafedə işlədiyini izah edib. Bu sözlərdən əsəbləşən Elmir bibisi qızına çoxsaylı bıçaq zərbələri vurub. Qadın xəstəxanaya çatdırılıb və onun həyatı xilas edilib.
Cinayət işi üzrə təqsirləndirilən şəxs qismində ifadə verən Elmir elan olunmuş ittiham üzrə özünü qismən təqsirli bilib:
“Bibim qızı Səbinənin “Məhəllə” adlı kafedə çalışdığını eşitdim, onun barəsində məndə pis fikirlər yarandı. Onun çalışdığı kafeyə müxtəlif yad kişilərin gəlməsi, Səbinənin onların qarşısına çay qoyması, pivə süzməsi, hadisədən bir neçə gün əvvəl əlində araq şüşəsi ilə kafeyə daxil olarkən görməyim mənə pis təsir bağışladı”.
Cinayət işi üzrə zərərçəkmiş şəxs məhkəmədə ifadə verib:
“2011-ci ildə həyat yoldaşımdan rəsmən ayrıldıqdan sonra Lənkəranda, atam evində yaşamışam. 2016-cı ildə isə Bakı şəhərinə gələrək Bakıxanov qəsəbəsində şirniyyat sexində təxminən 2 ay xadimə, sonra 4 aya yaxın aşpaz köməkçisi işləmişəm. İşlədiyim əraziyə yaxın ünvanda kirayədə qalmışam.
Bir müddət sonra isə hazırda kirayədə qaldığım Keşlə qəsəbəsinə köçdüm. İşsiz olduğum üçün yaşadığım ünvana yaxın “Məhəllə” adlanan kafedə təmizləyici işi taparaq orada işləməyə başladım. Kafenin mətbəxində təmizləmə işlərini görmüşəm, ara-sıra müştərilərə qulluq etmişəm. Gördüyüm işlərin müqabilində mənə ayda 300 manat əməkhaqqı verilib”.
Elmir barəsində “Xuliqanlıq niyyəti ilə adam öldürməyə cəhd”, “Silah qismində əşyadan istifadə etməklə xuliqanlıq törətmək” və “Qanunsuz olaraq soyuq silah gəzdirmə” maddələri ilə ittiham elan edilib. Bakı Ağır Cinayətlər Məhkəməsinin hökmü ilə Elmir 13 il 6 ay müddətinə azadlıqdan məhrum edilib.
