Bakının R.Əliyev adına 3 nömrəli məktəbdə işçinin içəri buraxılmaması ilə bağlı sosial şəbəkələrdə videogörüntülər paylaşılıb. Mübahisə iştirakçılarının sözlərinə görə, məktəbin direktoru qapıları bağlatdıraraq işçisini məktəbə buraxmır. Bu haqda bu gün, 31 mart tarixində APA məlumat verib.
Hadisə ilə bağlı məktəbin rəsmisi açıqlama verib. Bildirilir ki, həmin videogörüntülər martın 13-də keçmiş təsərrüfat müdiri tərəfindən lentə alınıb. Həmin qadın Əmək Məcəlləsinin 70-ci maddəsinin “ç” bəndinə əsasən, işdən azad edilib.
Məkbəbdən bildirilib ki, həmin şəxs işdən azad edilməsinə baxmayaraq, zorla məktəbə daxil olur, təhsil müəssisəsinin iş ahəngini pozur.
"Hər dəfə xəbərdarlıq edilsə də, müxtəlif təhdidlərlə məktəb rəhbərliyinə hədə-qorxu gəlir. Bununla bağlı hüquq-mühafizə orqanlarına məlumat verilib.
Qeyd edək ki, keçmiş təsərrüfat müdirinin məktəbin fəaliyyətinə ciddi maneə yaradan əməllərindən (siqnalizasiya, istilik, işıq sisteminə müdaxilə edir, yerə su tökür və s.) narahat olduğumuz üçün mühafizəçiyə onun məktəbə daxil olmasına icazə verilməməsi tövsiyə olunub.
Bu kimi hallardan dərin təəssüfümüzü ifadə edirik, məktəbin normal iş ahənginin qorunması üçün bütün qanunauyğun tədbirlərin görülməsi diqqət mərkəzində saxlanılır", - məktəbdən vurğulanıb.
