“Həyat yoldaşım, Azərbaycan Hərbi Prokurorluğunun İstintaq İdarəsinin mühüm işlər üzrə baş müstəntiqi, ədliyyə polkovnik-leytenantı Ceyhun Hüseynov məni döyür və silahla hədələyir”, - bu sözlərlə Nərgiz Hüseynova mətbuata müraciət edib. Bu haqda bu gün, 1 mart tarixində Bakuplus.az məlumat verir.
Onun sözlərinə görə, onlar 7 ildir ailəlidirlər, iki azyaşlı övladları var.
“İl yarımdır ki, Ceyhun Hüseynov evə gəlmir, əxlaqsız qadınlarla yaşayır. Hər dəfə evə gələndə mənə işgəncə verir. Sonuncu dəfə bu il fevralın 21-də axşam saatlarında evə gəlib, uşaqlarını dostu Mübarizlə apardılar. Daha sonra geri qayıtdı, dövlətin ona verdiyi silahı zorla mənim başıma dirədi və “sənə xəyanət etmişəm” sözlərini deməyimi bildirdi. Həmin görüntüləri dostu Mübariz çəkib. Həmin gecə saatlarla mənə fiziki zorakılıq göstərdi. Uşaqları yenidən evə gətirdi və özü getdi”, - deyə Hüseynova iddia edir.
22 fevral tarixində Hüseynov evə gələrək uşaqları özü ilə aparıb.
“Daha sonra məni zorla çöllük bir yerə aparıb dəmir parçası ilə vurdu. Yenə də mənə ona “xəyanət etmişəm” sözünü dedirtdi. Şok vəziyyətində idim, məni evə gətirərək əl-ayağımı bağladı. Sonra ona yalvardım, əl-ayağımı açdı.
Mənə bildirdi ki, evə gəlib məni yenə döyəcək. Həmin vaxt üstümə bıçaq çəkdi. Səhəri gün pəncərədən yaşadığımız evin həyətinə və oradan da qonşuların həyətinə tullandım. Onlardan biri mənim həyətindən keçməyimə icazə verdi. Mən taksiyə minib Abşeron Rayon Polis İdarəsinə getdim.
Övladlarım tanımadığım qadınların yanındadırlar. Mənim həyatım da təhlükədədir. Ceyhun məni hədələyir ki, dövlətin ona verdiyi silahla məni öldürəcək”, - Hərbi Prokurorluğunun əməkdaşının həyat yoldaşı davam edib.
Baş Prokurorluğun mətbuat xidmətindən bildirilib ki, həmin videogörüntülərə əsasən, araşdırmalara başlanılıb.
