Şəhərsalma və Arxitektura Komitəsinin tikintiyə rəsmi icazəsi olmamasına, eləcə də Bakı Nəqliyyat Agentliyinin razılıq verməməsinə baxmayaraq, Bakının Nərimanov rayonu, Koroğlu Rəhimov küçəsində yerüstü piyada keçidinin tikintisi davam etdirilir. Bu haqda bu gün, 14 mart tarixində Bakuplus.az İnsan yönümlü şəhərlər səhifəsinin müəllifi Anar Əliyevə istinadən məlumat verir.
Anar Əliyev peşakar urbanist olaraq əraziyə baxış keçirib, həmin keçidin tikilməsindən sonra yaranacaq mənfi təsirdən danışıb.
Onun sözlərinə görə, hazırda burada eynisəviyyəli tənzimlənən keçid, yəni “zebra” var, tikilən yerüstü keçidi isə sökmək olar. Bu cür keçidlərin tikintisi köhnəlmiş təcrübədir, nəqliyyat elmi dəfələrlə sübut edib ki, bu keçidlər şəhərdəki tıxacların sayına təsir etmir, onları yalnız növbəti kəsişməyə keçirir.
Bundan əlavə, belə keçid səkini xeyli daraldır və şəhəri daha da əlçatmaz edir. Bəzi ölkələrdə əks islahatlar aparılır, şəhəri piyadalar üçün daha rahat etmək üçün yerüstü və yeraltı keçidlər klassik “zebra”larla, işıqforlarla əvəz edilir. İnsanlar üçün əlverişli şəhərin yaradılması daha az vətəndaşın nəqliyyatdan istifadə etməsi ilə nəticələnir, nəticədə nəqliyyat sıxlığı azalır.
