Bakıda qadın sevgilisi tərəfindən girov saxlanılıb. Bu haqda 28 aprel tarixində Bakuplus.az Kriminalqafqaz-a istinadən xəbər verir.
Sabunçu rayonu, Maştağa qəsəbəsində ötən il 28 yaşlı Murad Məmmədov (soyad şərtidir) qeyri-rəsmi münasibətdə olduğu Minəxanım Hüseynovanı(soyad şərtidir) 13 gün həyətindəki yarımtikilidə saxlayaraq dəfələrlə döyüb, sağlamlığına ağır xəsarətlər yetirib. Məhkəmədə ifadə verən Məmmədov bildirib ki, Minəxanımın ailəsi ondan imtina etmişdi və onlar tanış olanda ona yazığı gəldiyi üçün kirayə ev tutmuşdur. Daha sonra isə onlar bir yerdə yaşamağa başlayıblar. Lakin bir müddət sonra Hüseynova tüfeyli həyat sürməyə başlayıb və günlərlə evə gəlmiyib.
“Bir müddət sonra onu yenidən gördüm və evimizin həyətindəki yarımtikilidə qalması üçün gətirdim. Aramızda qısqanclıq zəminində mübahisə düşdüyü üçün onu döymüşəm. Amma onun əl-ayağını bağlamamışam. Minəxanım üçün həmin yarımtikiliyə tez-tez yemək-içmək də aparmışam. 13 gün sonra polislər gələrək bizi şöbəyə aparıb”, - deyə Məmmədov bildirib.
Minəxanım Hüseynova ifadəsində deyib ki, yaşamağa yeri olmadığına görə, Muradın evinə gələrək onunla qalmaq istəyib.
“Mənim daimi qalacaq yerim olmadığına görə, onun həyətindəki yarımtikilidə qalmaq istədim. Murad məni çox qısqanırdı. Dəfələrlə buna görə məni həyətdə döymüşdü. Amma əl-ayağımı bağlamayıb. Mənə yemək də verib. O, hər dəfə məni döyəndə ona yalvarırdım bunu etməsin, artıq ağrıya dözə bilmirdim. Lakin buna məhəl qoymayaraq, məni hər gün döyürdü, hətta qabırğalarımı sındırmışdı. Sonuncu dəfə o, mənim barmaqlarımı sındırdı və başıma elə zərbə vurdu ki, üç tikiş qoyuldu. Amma mən onun sözündən çıxmırdım, həmin evdən gedə biləcəyim halda da heç yerə getmədim və heç kimə şikayət etmədim. Çünki o, mənim ərim idi. Bizim qəsəbədə qadının ərindən ayrılması xoş qarşılanmırdı”, - deyə zərərçəkən Hüseynova məhkəmədə ifadə verib.
Bakı Ağır Cinayətlər Məhkəməsinin hökmü ilə təqsirləndirilən Murad Məmmədov 7 il müddətinə azadlıqdan məhrum edilib.
