Azərbaycan Tibb Universitetinin Tədris Terapevtik Klinikasının bir qrup əməkdaşı hüquqlarının pozulduğunu iddia edir. Bu haqda bu gün, 1 mart tarixində Bakuplus.az BakuTV-yə istinadən məlumat verir.
İşçilərin sözlərinə görə, onlar uzun müddətdir ki, maaş ala bilmirlər. Səhiyyə işçiləri öz hesablarına məzuniyyətə çıxmağa məcbur olduqlarını deyirlər.
Tədris Terapevtik Klinikasının bir qrup əməkdaşının əməkhaqlarının verilməməsi ilə bağlı yaranmış vəziyyətə Azərbaycan Tibb Universitetinin (ATU) rəsmisi Günel Aslanova münasibət bildirib. Onun sözlərinə görə, dünən universitetin rektoru, professor Gəray Gəraybəyli və prorektorlar həmin işçilərlə görüşüblər.
“Görüşün nəticəsi olaraq Elmi Şura keçirildi və xüsusi bir vəziyyət yarandığından qərar qəbul olundu ki, işçilərin ikiaylıq maaşı universitetin büdcəsindən ödənilsin. Bu gün onlar maaşlarını alacaqlar”, - deyə mətbuat xidmətinin rəhbəri vurğulayıb.
Aslanova qeyd edib ki, Tədris Terapevtik Klinikasının kommunal xərcləri də ödəniləcək.
“Şikayətçilərin digər şikayət etdikləri məsələlərlə bağlı araşdırma aparılır”, - deyə universitetin nümayəndəsi əlavə edib.
[caption id="attachment_92440" align="alignnone" width="640"]
Foto Baku Tv-nin rəsmi Youtube kanalı[/caption]
