Bakıda narkotik istifadəçilərinin yığışdığı yeni yer aşkarlanıb. Bu haqda ATV telekanalı reportaj hazırlayıb.
Paytaxtın Yasamal rayonu Zivərbəy Əhmədbəyov küçəsindəki yarımçıq tikili narkotik istifadəçilərinin yuvasına çevrilib. Narkotik vasitələrin istifadəsi və satışı adıçəkilən tikilidə həyata keçirilir.
Tikilinin hər mərtəbəsində narkotik istifadəçilərinə rast gəlmək olur. Narkomaniya bəlasına düçar olaraq evsiz-eşiksiz qalanlardan bir neçəsi soyuq havada bu tikilidə gecələyir. Addımbaşı şpris və elastik iplərə rast gəlmək olur. Bir sözlə, burada acınacaqlı vəziyyət hökm sürür.
Yarımçıq tikilidə gecələyən şəxslərdən birinin sözlərinə görə, gün ərzində təxminən 200 nəfərə yaxın narkotik istifadəçisi buraya gəlir. Onların arasında qızlar və hətta yaşlı qadınlar da var.
Daxili İşlər Nazirliyinin əməkdaşı Nurlan Əliyev məsələyə münasibət bildirib: “Ərazi tam nəzarət altına götürülüb və bu neqativ halların qarşısı tamamilə alınmayana qədər həmin ərazidə polis əməkdaşları 24 saat xidmət göstərəcəklər. Ümumiyyətlə, əgər polis tərəfindən orada bu neqativ əmələ əl atan şəxslər aşkarlanarsa, həmin şəxslər barədə qanuna müvafiq tədbirlər həyata keçiriləcək”.
Zərərli vərdişlərin qurbanı olan şəxslər şəxsiyyət vəsiqəsi ilə narkoloji dispanserlərə müraciət edə bilərlər.
[URIS id=41138]
