Yolun hərəkət hissəsində və yaxud taksi dayanacaqları ərazisində quraşdırılan zibil qutuları Bakının Xətai, Nizami, Xəzər rayonlarında daha tez-tez müşahidə olunan mənzərəyə çevrilib. Bu haqda bu gün, 4 aprel tarixində Bakuplus.az Xəzər Xəbər-ə istinadən məlumat verir.
Nəqliyyatın intensiv olduğu ərazilərdə, eləcə də metro stansiyalarının yaxınlığında quraşdırılan zibil qutuları onsuz da dar olan ikizolaqlı yollarda günün müxtəlif saatlarında tıxac yaradır. Hava küləkli olanda isə həmin qutular aşaraq nəqliyyat və piyadalar üçün təhlükəyə səbəb olur.
Konteynerlərdən zibili yığışdıran kommunal maşınlar isə həm üfunət yayır, həm də yolun qalan zolağını zəbt edir.
Məsələ ilə bağlı Bakı Şəhər Mənzil-Kommunal Təsərrüfatı Departamentindən bildirildi ki, paytaxtın bütün rayonlarında konteyner meydançaları mövcuddur. Bununla belə, 15-20 il əvvəl planlaşdırılan qutu yerləşdirmə məntəqələrinin yeri dəyişməyəcək.
