Bakıdakı köhnə kinoteatrların aqibəti nə yerdədir? Bu haqda bu gün, 25 fevral tarixində Bakuplus.az İctimai TV-yə istinadən xəbər verir.
Bir vaxtlar paytaxt ərazisində 20-yə yaxın fərqli kinoteatr fəaliyyət göstərib. Onların arasında “Sevinc”, “Vətən”, “Araz”, “Pioner” və ya “Qarabağ” adlı kinoteatrlar da olub.
4-cü mikrorayon ərazisində yerləşən 70-ci illərdə “Pioner” kimi fəaliyyətə başlayan kinoteatrın adı 90-cı illərdə “Qarabağ”la əvəz olunmuşdur. Artıq 10 ildən çoxdur ki, kinoteatrın ətrafı hasarlanaraq fəaliyyəti dayandırılıb. İçərisindəki oturacaqlar da toz basaraq yararsız hala düşüb.
“Uşaqlıqda burada çoxlu “krujok”lar olurdu. Kino da olub, uşaqlar üçün cizgi filmləri də. Bunun zalları çox idi. Sadəcə atdılar, elə qaldı, baxan yoxdur”, - deyə sakinlərdən biri bildirib.
Mədəniyyət Nazirliyindən məsələ ilə bağlı bildiriblər ki, sözügedən bina onların balansında deyil və özəl mülkiyyətdir. Bu səbəbdən binanın taleyinin necə olacağı barədə məlumat yoxdur.
