Bakı küçələrində zolaqlardakı boyaların silinməsi sürücülərin və piyadaların narazılığına səbəb olur. Görünməyən piyada zolaqları bəzən cərimələnməyə, bəzən isə qəzaya səbəb ola bilər. Bu haqda bu gün, 2 avqust tarixində Bakuplus.az Azərtac-a istinadən məlumat verir.
Piyada zolaqlarının silinməsi ən təhlükəli şəraiti piyadalar üçün yaradır. Tamamilə silinən xətləri görməyən sürücülər vaxtında əyləcə basmır, piyadalar isə hərəkətə davam edirlər.
Ekspertlər yolların nişanlanması zamanı istifadə edilən boyaların adi boyadan fərqli tərkibdə olmağının vacibliyini vurğulayırlar.
DYP İdarəsinin inspektoru Elvin Hacıyev qeyd edib ki, yolların nişanlanması və yenidən boyanması kimi məsələlər paytaxtın inzibati ərazisinə düşən küçə və prospektlər istisna olmaqla, Baş DYPİ-yə bilavasitə tabe olan “Siqnal” İxtisaslaşdırılmış Layihə-İstehsalat İdarəsi tərəfindən həyata keçirilir. Nişanlanma 1968-ci il 8 noyabr tarixində yol nişanları və siqnallar haqqında qəbul edilmiş Vyana konvensiyasına uyğun olaraq təmin edilir.
Qeyd edilən konvensiyanın 6-cı maddəsində yazılır ki, sürücülər üçün nəzərdə tutulmuş nişanlar elə quraşdırılmalıdır ki, sürücülər onları asanlıqla və vaxtında görə bilsinlər.
Həmçinin asfalt örtüyü üzərindəki boyaların silinməməsi üçün xüsusi termoplastik boyalardan istifadə olunmalıdır. Əvvəlcə yolun üzərinə dəmir zolaq çəkilir, zolağın üstündə toz halında maddə tökülür və bu maddə həmin dəmir zolağa yapışır. Bundan sonrakı mərhələdə isə həmin dəmir zolaq yol zolağı halına gətirilir. Bu zolağı digər zolaqlardan fərqləndirən cəhət isə həm yağışa qarşı, həm avtomobil təkərlərinin sürtülməsinə qarşı davamlılığıdır.
