Bakıda “Beşmərtəbə” adlanan ərazi avtoxuliqanların toplaşdığı məkana çevrilib. Xəzər Xəbər-dən verilən məlumata görə, vətəndaşlar bu ərazidə təhlükəli manevrlər edərək digər hərəkət iştirakçılarına təhlükə yaradan daha bir sürücünü lentə alıblar.
Sosial şəbəkələrdə yayılan müvafiq görüntülərdən sonra Dövlət Yol Polisi ərazini nəzarətə götürüb.
Oxşar hadisə Nəsimi rayonu, Cavadxan küçəsində də baş verib. Axşam saatlarında 4-cü mikrorayon ərazisindəki dairəvi yolda taksi sürücüsünün törətdiyi avtoxuliqanlıq videokameralara düşüb.
Baş Dövlət Yol Polisi İdarəsinin (BDYPİ) polis şöbəsinin böyük inspektoru Araz Əsgərlinin verdiyi məlumata görə, bu qanun pozuntusunu törədən Məhyəddin Cəbiyev saxlanılıb. Onun barəsində protokol tərtib edilib. Nəsimi Rayon Məhkəməsi sürücünü 500 manat məbləğində cərimələyib, həmçinin onu bir il müddətinə sürücülük vəsiqəsindən məhrum edib.
Yol polisi paytaxtın bir sıra küçə və prospektlərində - bu cür hərəkətlərə daha çox yol verilən ərazilərdə nəzarəti gücləndirib.
