Bakı məktəbinin məzunu dünyanın ən prestijli universitetlərindən qəbul alıb. Bu haqda bu gün, 23 avqust tarixində Bakuplus.az Bakı Dövlət Universitetinə isitnadən xəbər verir.
Adıçəkilən təhsil ocağının nəzdində olan “Gənc istedadlar” liseyinin məzunu Murad Novruzov nüfuzlu universitetlərə qəbul alıb. O, Toronto, eləcə də Kanadada yerləşən Britaniya Kolumbiyası Universiteti, Belçikada yerləşən Löven Katolik Universiteti və Koreyanın Qabaqcıl Elm və Texnologiya İnstitutuna qəbul olub.
M.Novruzov Beynəlxalq Tələbə Təqaüdünün də qalibidir. Onun təhsil aldığı müddətdə alacağı təqaüd məbləği 80 min ABŞ dolları təşkil edir.
M.Novruzov 2021-ci ildə “Sabahın alimləri” X respublika müsabiqəsində riyaziyyat nominasiyası üzrə II yerə layiq görülüb. O, “Gənc istedadlar” liseyini qızıl medalla bitirib.
