Bakının bəzi sakinləri onların yaşadığı küçələrin adının olmamasına görə təcili tibbi yardım briqadası çağırmaqda çətinlik çəkirlər. Bu haqda bu gün, 13 aprel tarixində Bakuplus.az APA TV-yə istinadən məlumat verir.
Sakinlər təcili yardım maşınını qarşılamaqdan ötrü xeyli yol qət etməli olurlar. Evdə xəstənin yanında heç bir adam yoxdursa, bu faciə ilə də nəticələnə bilər.
Təcili yardım briqadalarının əməkdaşları da vəziyyətdən narahatdırlar. Ünvanı olmayan yerə çağırışda yubanan həkimlər xəstələrə vaxtında kömək göstərə bilmirlər. Onlar bir xəstənin olduğu yeri tapmağa çalışarkən digər çağırışlara da gecikmiş olurlar.
Xarici ölkələrdə təcili yardım xidmətləri GPS sistemindən istifadə edir. ABŞ-dəki "911", Kanadada "Emergency App", Avropa İttifaqı üzrə "112" kimi tətbiqlər var. İT üzrə mütəxəssis Fərid Kazımovun sözlərinə görə, küçələrə ad verilmədiyi müddətcə problemin aradan qalxması üçün yeganə çıxış yolu xaricdəki təcrübədən istifadə etməkdir. Mobil tətbiq sistemindən istifadə olunması hər iki tərəfin ortaq probleminin yeganə həlli kimi görünür.
