Bakının nəqliyyat sistemində əsas problemlərdən biri parklanmadır. İnfrastrukturun bərpası ilə bağlı mütəmadi işlər görülsə də, paytaxtın küçələrində indiyə qədər dayanma-durma məsələsi öz həllini tapmayıb. Sürücülər deyirlər ki, parkinq yerləri azdır, qiymətləri də çox yüksəkdir. Bu haqda bu gün, 12 aprel tarixində Bakuplus.az Xəzər Xəbər-ə istinadən məlumat verir.
Özəl parkinqlərdə avtomobilin 2 saat saxlanılmasının qiyməti 1 manat, 6 saat üçün 2 manat, 12 saat üçün isə 3 manatdır. Tariflər bazar qiymətlərinə uyğun tənzimlənir. Mərkəzi hissələrdə qiymətlər tələbata görə bir qədər yüksəkdir.
Nəqliyyat məsələləri üzrə ekspert Ərşad Hüseynovun sözlərinə görə, parklanma ilə əlaqədar yaranan problem yol infrastrukturu ilə bağlıdır. Şəhərsalma qaydalarına riayət olunmaması və məskunlaşmanın artması bu problemi daha da artırır. Ekspert parkinqlərin çoxunun ödənişli olmasını doğru hesab etmir.
Bakı Nəqliyyat Agentliyinin (BNA) Yol hərəkətinin təşkili şöbəsinin müdiri Tərlan Səfərov qeyd edib ki, hazırda müxtəlif küçələrdə ümumilikdə 15.000-ə yaxın avtomobil üçün parklanma yeri var. Tariflər hələ müəyyən olunmasa da, bununla bağlı hökumətə təkliflər verilib. Özəl parkinqlərin qiyməti isə hər hansı bir qanunla tənzimlənmədiyi üçün müxtəlifdir.
“Bakı şəhərində 4 zona tərtib edilib. Təbii ki, mərkəz zonası həm də biznes zonası olduğuna görə burada qiymətlər digər zonalara nisbətən daha yüksək olacaq. 4-cü zona ümumiyyətlə şəhər ətrafı əraziləri əhatə edir və burada ilkin mərhələdə parklanmanın ödənişsiz olması nəzərdə tutulub”.
Tərlan Səfərov bildirib ki, parklanma yerləri ilə bağlı tariflər yaxın vaxtlarda müəyyən ediləcək.
