Ətin bir kiloqramı 14-18 manat aralığında olduğu halda çəkilmiş dana ətinin qiyməti 14 manatdan aşağı təklif edilir. Ət sümükdən ayrıldıqda və çəkildikdə sahibkar bunu daha yüksək qiymətə satmalıdır. Amma reallıqda bunun əksi müşahidə edilir. Bu haqda bu gün, 3 avqust tarixində Bakuplus.az ARB Xəbər-ə istinadən məlumat verir.
Supermarketlərdən fərqli olaraq, kiçik dükanlarda qiymətlər başqadır.
“Mal ətinin qiyməti 14 manat, sümüksüz ət 17 manat. Qiyməyə piy qatırlar, buna görə ucuz verirlər, -deyə qəssablar iddia edirlər. - Bu, təmiz dana əti olmur, içində qatqı olur”.
Qida mütəxəssislərinə də bu istiqamətdə şikayətlər çox olur.
“İstehlakçı bilmir, onun tərkibində nə var. Bəzən də kartof vururlar, nişasta vururlar. Buna görə də qiyməti aşağı olur. Adətən qiymə çəkənlər qiymələrinə öncədən köhnə xarab olmuş ət atırlar. Əsl qiymə marketlərdə satılan qiymətə başa gələ bilməz. Minimum həmin ətin qiymətində olmalıdır”, - Azad istehlakçılar birliyinin sədri Eyyub Hüseynov öz fikrini bildirib.
Birlik sədri, həmçinin deyir ki, mövcud qaydalara görə, əmtəə bazarında satılan bütün malların üzərində istehsalçı firmanın tərkibi və ünvanı qeyd edilməlidir. Ət yalnız alıcının, yaxud da baytar həkimin yanında sümükdən ayrılıb çəkilə bilər. Bununla yanaşı, çəkilmiş ətin baytarlıq arayışı da olmalıdır. Həmin sənəddə hansı heyvanın əti olması və hansı səbəbdən çəkilməsi göstərilməlidir. Bu kimi qeydlərin göstərilmədiyi məhsul artıq şübhəli hesab olunmalıdır.
