Bakıda daha bir mötəbər futbol turnirinə start verilib. Paytaxtımız “Dünya neft və qaz kuboku 2025”ə ev sahibliyi edir. Yarışda Azərbaycan, Almaniya, Oman və Misirin müxtəlif neft və qaz kompaniyalarını təmsil edən 12 komanda yarışır.
Futbolxeber.az xəbər verir ki, bu gün “ASK Arena”da turnirin açılış mərasimi keçirilib. Əvvəlcə Azərbaycan Respublikasının dövlət himni səsləndirilib. Daha sonra turnirin formatı və iştirakçılar barədə məlumat verilib. Rəmzi lentin kəsilməsi ilə yarış açıq elan edilib.
Turnirin formatı barədə qeyd edək ki, komandalar yarım meydanda mübarizə aparırlar. Hər kollektivin start heyətində 1 qapıçı və 6 meydan oyunçusu yer alır. Komandalar hər biri 15 dəqiqədən ibarət olmaqla 2 hissədə mübarizə aparırlar. Dairəvi sistem üzrə keçirilən yarışda yekunda ən çox xal toplayan 2 komanda finalda mübarizə aparacaq.
Açılış mərasimindən sonra yarış start götürüb. 1-ci meydanda SOCAR və Omanın PDO (Petroleum Development Oman) komandaları, 2-ci meydanda isə “Azəriqaz” və OQ (Omanın neft-qaz kompaniyası) üz-üzə gəliblər.
SOCAR və Omanın PDO komandaları arasında matç gərginliyi ilə yadda qalıb. Hərəyə bir dəfə fərqlənən tərəflər yekunda meydandan 1 xalla ayrılıblar.
Oman komandasının kapitanı Qasim Al Riyami Bakıda olmaqdan məmnunluq duyduqlarını bildirib: “Bu yarışda iştirak etdiyimiz üçün təşkilatçılara təşəkkürümüzü bildiririk. Çox maraqlı yarış keçir. Azərbaycanda olduğumuz üçün şadıq. İnsanlar çox istiqanlıdırlar. Yeməkləriniz də çox dadlıdır. Burada özümüzü evdəki kimi hiss edirik. Yarış çox maraqlı başlayıb. Oyunlar gərgin keçir. Arzumuz vaxtımızı gözəl keçirmək və yaxşı nəticə qazanmaqdır. İlk matçda yerli SOCAR komandası ilə üz-üzə gəldik. Rəqib çox yaxşı mübarizə apardı. Oyuna fəal başlamışdılar. Lakin biz də təslim olmaq fikrində deyildik. Yekunda heç-heçə qeydə alındı. Ümid edirəm ki, onlarla yenidən finalda üz-üzə gələk”.
