Balaxanı qəsəbəsi, 2-ci mədən, 28 May küçəsinin sakinləri yağış yağanda əllərinə kürək götürüb suyun axınını dəyişirlər ki, evlərini su basmasın. Lakin gölməçələrdə suyun həcmi artdıqda evlərin zirzəmiləri yağış suyunun altında qalır. Bu haqda RealTV reportaj hazırlayıb.
Kənd sakinləri təəssüflə qeyd edirlər ki, Balaxanının mərkəzi sürətlə inkişaf etsə də, dövlət qurumları kəndin digər hissələrinə o qədər də diqqət yetirmir.
Yağış yağanda keçilməz küçələr məhəllənin yaşlı sakinləri üçün təhlükə mənbəyinə çevrilir. Bazara, dükana gedə bilməyənlər, onlar gün ərzində uşaqlarının işdən qayıtmasını gözləməli olurlar.
Bələdiyyə sədri Bahadur Həşimov məsələ ilə bağlı bildirib ki, 2-ci mədən 28 may küçəsi mədən ərazisi olduğundan orda hər hansı yenidənqurma işlərinin aparılması mümkün olmayıb. Buna görə də nə küçələrə asfalt döşəmək mümkündür, nə də məhəlləyə kanalizasiya xəttləri çəkmək. Amma sakinlərin şikayətləri nəzərə alınaraq yaxın vaxtlarda küçənin qismən təmiri həyata keçirilə bilər.
Ərazinin təmizlənməsinə gəlincə, bələdiyyə sədri problemi tezliklə həll edəcəyinə söz verib.
