Üç nəfərin 344 min manat pulunu dələduzluq yolu ilə ələ keçirməkdə təqsirləndirilən Bakı Dövlət Universitetinin (BDU) keçmiş baş müəllimi Həcər Mikayılova həbs olunub. Bu haqda bu gün, 9 avqust tarixində Bakuplus.az Qafqazinfo-ya istinadən məlumat verir.
Zərərçəkmişlər Anar İsmayılov və Qüdrət Həsənov Belarusdan Azərbaycana toyuq məhsulları idxal edən şirkətin rəhbərləridir.
Təqsirləndirilən şəxs özünü oğlunun direktoru olduğu “MİN 300” MMC-nin faktiki sahibi kimi təqdim edərək, əvvəldən tanıdığı anbarda Azərbaycana gətirilən ümumilikdə 80 ton toyuq məhsulunu yerləşdirməyə nail olub. Bir müddət sonra Mikayılova anbardan malı çıxararaq satışını təşkil edərək 332.000 manat pulu ələ keçirib.
Bundan başqa, Mikayılova daha bir zərərçəkmiş Məzahir Dostuyevə torpaq çıxarışı almasına kömək edəcəyi ilə bağlı yalan vəd verərək ondan 12.000 manat pul alıb.
Bu əməllərə görə ona qarşı “Dələduzluq - külli miqdarda törədildikdə” maddəsi ilə yekun ittiham irəli sürülüb, barəsində həbs qətimkan tədbiri seçilib.
Həcər Mikayılova BDU-nun Coğrafiya fakültəsində baş müəllim vəzifəsində çalışıb.
[caption id="attachment_108986" align="alignnone" width="640"]
Foto açıq mənbədən[/caption]
